Tschintg ospitals universitars e divers medis avevan tramess ina brev al Cussegl federal ed avertì en quella d'in collaps da Covid-19 en ils ospitals. Sco che la «SonntagsZeitung» ha rapportà, hajan els gronds quitads davart la situaziun actuala.
Ils letgs sin las staziuns intensivas vegnian pli e pli stgars, il persunal da gira saja a la limita. Er Lukas Engelberger, il president da la conferenza svizra dal directurs chantunals da sanadad pretenda ulteriuras restricziuns. Quai surtut per evitar ina «terza unda» durant il temp da Nadal.
Berset: «Prender fitg serius»
Ils cloms d’agid da medis e ospitals svizzers stoppian ins prender fitg serius, ha ditg il cusseglier federal Alain Berset en in’intervista cun la televisiun da la Svizra franzosa RTS. Vitiers ha Berset suttastritgà che l'entir Cussegl federal vegnia a prender novas mesiras il venderdis, sche la situaziun na sa megliureschia betg.
