Per flora e fauna - La biodiversitad grischuna è en privel

Il team da Terraviva ch'è anc plitost pitschen cusseglia, sensibilisescha, organisescha curs e projects per mantegnair e rinforzar il spazi da viver d'animals, da la flora, dals micro-organissems e la finala era da nus carstgauns. Per far quai ha l'organisaziun survegnì in millliun francs dal chantun e da la Confederaziun. L'onn passà ha il chantun publitgà in rapport da 600 paginas che mussa in status quo precar: Bleras spezias èn gia svanidas ed ina gronda part dal spazi da viver è ì a perder.

Diversas purschidas

Per meglierar la situaziun organisescha Terraviva proximamain in curs nua che persunas interessadas pon emprender da revitalisar zonas verdas en lur vischnancas. Plinavant ha Terraviva era gia organisà forums da biodiversitad e fatg guidas tras la citad da Cuira per guardar tge spezias d'animals e da flurs ch'ins chatta là.

Stgazis natirals dal Grischun

Terraviva ch'i dat dapi l'enttschatta da quest onn fa era lavur manuala cun eliminar neofitas u bajegiar in lajet per amfibis. Il mument fa Terraviva projects per l'Uffizi per la natira e la cuntrada dal Grischun e vegn era finanziada cun daners publics. En il futur duai era dar daners da terzas persunas uschia ch'els possian realisar anc dapli projects, e betg be exclusivamain tals per il chantun, di il mainafatschenta da Terraviva Thomas Voneschen envers il schurnal regiunal grischun da SRF.

Nagina organisaziun politica

Ses giavisch fiss che betg be la biodiversitad en il Grischun sa meglierass, mabain era la chapientscha per l'organisaziun. Per blers e bleras na saja betg adina cler ch'els na sajan nagin'organisaziun per la protecziun da la natira. Els sajan politicamain neutrals, uschia Thomas Voneschen plinavant.