Actualmain survegnan anteriuras commembras e commembers da la regenza fin la fin da lur vita ina renta che dependa da lur temp d'uffizi e po esser fin 110'000 francs ad onn. Il Cussegl grond è da l'avis che quai saja stravagà. Perquai ha el decidì che questa renta duai mo pli vegnir pajada fin maximalmain tar la vegliadetgna da pensiun. Quai tanschia.
Deputadas e deputads han uss surdà a la regenza l'incumbensa dad elavurar ina proposta co questa renta scursanida duai guardar ora. Sin maisa eran anc duas ulteriuras incumbensas en il medem connex. La PPS ha vulì stritgar las rentas dal tut ed ils verd-liberals han vulì ch'i dettia mo trais onns ina renta. Questas duas propostas n'han dentant chattà nagina maioritad.
PPS lantscha iniziativa
La PPS n'è insumma betg cuntenta cun la decisiun dal Cussegl grond da mo limitar las rentas e betg stritgar ellas dal tut. Perquai vul ella lantschar ina iniziativa dal pievel cun la finamira da stritgar las rentas dad anteriuras ed anteriurs cussegliers guvernativs. Quai ha il president da la partida, Roman Hug annunzià en il Cussegl grond. Per l'iniziativa dovri almain 3'000 suttascripziuns.
