La regenza grischuna è pronta da sa fatschentar cun la pensiun che cusseglieras e cussegliers guvernativs survegnan cura ch'els bandunan lur uffizi. Uschia respunda la regenza trais incumbensas da fracziun.
Inizià da pliras partidas
Las fracziuns da la Partida populara, da la Partida liberaldemocrata e da la Partida verd-liberala scrivan en l'incumbensa, ch'il sistem actual na saja betg pli confurm al temp. Perquai vulan las partidas midar il reglament da pensiun actual per anteriuras cusseglieras e cussegliers guvernativs.
La PPS vul stritgar dal tuttafatg la pensiun. La PLD vul mo pli pajar ora daners fin che anteriurs cussegliers guvernativs giajan effectivamain en pensiun. Ed ils verd-liberals proponan che anteriuras ed anteriurs survegnan mo maximal trais onns suenter lur temps d'uffizi daners.
Anc nagina resposta concreta
Da quellas trais propostas concretas na scriva la regenza anc nagut. Ella vul sco emprim survegnir ina survista da la situaziun. E lura preschentar al parlament ina proposta co la pensiun duess vegnir reglada en il futur. Qua stoppian ins considerar plirs puncts: Per exempel quant ditg ch'insatgi è stà en uffizi ubain sche quella u quel surpiglian suenter il temp en la regenza in auter job. Co che l’istorgia cuntinuescha, decida il Cussegl grond il favrer.
