PPS, PLD e PVL
-
Reducir pensiuns per ex-cussegliers guvernativs
Suenter ch'il Cussegl grond n'ha betg introducì in temp da carenza, vegn uss la pensiun per cussegliers guvernativs sut la marella. Sco annunzià durant la debatta en la sessiun d'october han uss trais partidas inoltrà lur propostas.
Autor:
Flurin Guadench Andry
21.10.2022, 06:58
Las fracziuns da la Partida populara (PPS), la Partida liberaldemocratica (PLD) ed ils Verd-liberals (PVL) n'èn betg cuntentas cun il sistem da pensiun actual per anteriurs cussegliers e cusseglieras guvernativas.
Las trais partidas han perquai inoltrà incumbensas a la regenza, per che lezza preschentia in midament dal reglament da las pensiuns al Cussegl grond. Uss sto la regenza s'occpar da las incumbensas e proponer tge far cun quellas. Ina debatta datti lura en ina da las proximas sessiuns dal Cussegl grond.
Per tge pensiun vai?
Avrir la box
Serrar la box
Suenter che commembers u commembras da la regenza sa retiran survegnan els ina pensiun per il rest da lur vita. Sch'els partan gia l'emprim onn, lura è la pensiun 3,5% da lur paja sco commember. Per mintg'onn en l'uffizi vegnan 3,5% vitiers. Suenter 12 onns è quai tar la paja actuala en la regenza circa 110'000 l'onn.
Sche lur entrada surpassa il salari annual d'ina commembra da la regenza, na vegn betg pajar ora il surpli.
Las trais partidas han dentant differentas ideas co midar il reglament da pensiun.
Abolir il sistem actual
La partida populara vul stritgar il sistem actual da pensiuns. La PPS suttastritga ch'i na saja betg difficil da chattar novas plazzas per anteriurs cussegliers e cusseglieras guvernativas. Ella intunescha, che be pli 6 auters chantuns hajan anc ina tala pensiun, ella na saja betg pli confurma al temp. Ella vul incumbensar la regenza da chattar ina soluziun che saja pli confurma al temp.
Betg pli pensiun per vita duranta
Ils Verdliberals proponan en lur intervenziun da limitar la pensiun sin 3 onns suenter il temp en uffizi. La pensiun per vita duranta saja in privilegi betg giustifitgabel, uschia la partida. L'experientscha mussia ch'anteriurs commembers da la regenza n'hajan betg problems da chattar novas plazzas da lavur.
La fracziun da la Partida liberaldemocratica declera, ch'il sistem fetschia bain senn per il Grischun. Il temp d'uffizi saja numnadamain limità, cuntrari a blers auters chantuns en Svizra. Tenor la PLD duai la pensiun però be pli vegnir pajada fin la vegliadetgna da pensiun.
Quai di la lescha
Avrir la box
Serrar la box
La pensiun (Ruhegehalt) che cussegliers guvernativs survegnan suenter lur uffizi è descritta en artitgel 8 da la lescha davart ils salaris:
1 Suenter l'extrada or da la regenza exista in dretg supplementar sin ina pensiun per vita duranta. La pensiun importa per mintga onn d'uffizi 3,5 pertschient dal salari ch'è vegnì retratg sco ultim. Mintga onn d'uffizi cumenzà quinta sco onn cumplain.
2 Sch'ina anteriura commembra u sch'in anteriur commember da la regenza realisescha in'entrada da gudogn che surpassa – ensemen cun la pensiun – il salari annual d'ina commembra u d'in commember en uffizi, sto la pensiun vegnir reducida per l'import supplementar. Prestaziuns or da la prevenziun professiunala valan sco entrada da gudogn, e quai per la valur da la renta.
RTR novitads 06:00
