Las pendicularas grischunas han nudà il favrer 2024 in pitschen augment da giasts da 0,3%, cumpareglià cun il favrer da l'onn avant. Cumpareglià cun la media da 5 onns e 10 onns èn las cifras da giasts dal favrer 2,9% respectivamain 6,8% en il plus. L'excellent svilup da l'emprima mesadad da la stagiun n'ha betg pudì vegnir tegnì durant il favrer. La raschun èn en emprima lingia las cundiziuns da l'aura durant la segunda mesadad dal favrer. Plievgia, vent ed aura turbla han procurà per pli paucs giasts en la muntogna che las emnas avant. Il resultat è dentant anc adina positiv.
Enviern allegraivel 2023/24
La stagiun d’enviern 2023/24 (entschatta da la stagiun – fin da favrer) han visità 9,7% dapli giasts ils territoris grischuns da sport da naiv. En cumparegliaziun cun la media da 10 onns registreschan las interpresas da pendicularas schizunt in augment da giasts da 15,8%. I sa mussa la terz-meglra stagiun dals davos 20 onns. Bler sulegl, excellentas relaziuns da sport da naiv, ina vasta purschida d'auta qualitad sco er il basegn da far sport da naiv han contribuì decisivamain a quest svilup positiv.
Quintà giu vegn la fin da la stagiun
Las pendicularas grischunas guardan suenter la fin da las vacanzas da sport e cun il decurs da la stagiun fin uss en il dies da buna speranza vers Pasca. Fatg giu quint vegn dentant pir la fin da la stagiun. La primavaira ha gia cumenzà en la Bassa. Malgrà che las cundiziuns dal sport da naiv èn anc adina bunas en las muntognas, datti uschia gia bleras autras pussaivladads da passentar il temp liber.
