La Graubünden Vivonda serra sia fatschenta. Ella ha vendì products da Graubünden Viva en duas butias, en ina butia online e sur partenarias. La fatschenta saja stada sin ina buna via, ella stoppia dentant serrar las portas perquai che meds finanzials empermess na vegnian betg pajads. Da tgi ch'ella ha spetgà quels meds na scriva la fatschenta betg. Il chantun Grischun e la Confederaziun han dentant sustegnì la fatschenta en il passà tar la fundaziun avant trais onns.
Graubünden Viva è in'iniziativa dal chantun per la vendita da mangiativas grischunas. Graubünden Vivonda haja avert pliras butias tar las axas da traffic principalas ed haja furnì products a Coop, Migros, Aldi e Manor, scriva la fatschenta en ina communicaziun. Ella serra uss quellas duas butias e relascha las 28 persunas emploiadas sin il 2024. Las cifras da vendita na sajan betg stadas autas avunda per lubir vinavant in manaschi.
