Il public en mira da la campagna è per ina vart turists, da l'autra vart dentant er Grischuns e Grischunas sezs. Els duessan vegnir «sensibilisads davart ils product indigens», uschè Philipp Bühler, manader da project da Graubünden Viva. Betg mo la culinarica stat sin il plan, ma er tut ils products producids ni concepids en Grischun – da la turta da nuschs fin a la mobiglia.
En il center da la festa dals senns è adina puspè la scuntrada in grond tema.
Ils inscunters èn fitg impurtants per avair dapli contact tranter consuments e producents.
Dapli ch'in consument vegn a savair davart in product e tgi che producescha, pli probabel ch'el cumpra era quels products. Perquai èn er sguards davos las culissas dals producents sin il plan. Da là vegn era il num «festa dals senns». Il consument duess emprender d'enconuscher in product da differentas vart – quasi cun tut ils senns.
Chantun sponsurescha 5 milliuns francs
Il budget total da la campagna da 18 mais è tar 14 milliuns francs, tschintg milliuns vegnan da la regenza – pia daners da taglia. Per controllar sche quels raps vegnan investids bain, vegnian adina puspè mesirads ils effects dal program. Tenor Philipp Bühler sa mussa l'effect en rapports da medias, pli autas cifras da vendita e surtut tras producents cuntents.
RR novitads 06:00