Parlament da Cuira - Il pachet da spargn è per il mument giud maisa

Il pachet da spargn che la suprastanza da Cuira ha preschentà ils 19 d'avust è per il mument giud maisa. Il parlament n'è betg entrà en la discussiun davart il pachet da spargn. Cun 10 cunter 8 vuschs hani refusà da laschar s'occupar la cumissiun da gestiun da las mesiras per spargnar custs ed augmentar entradas ch'il cussegl da la citad aveva elavurà. In dals arguments: Il cussegl da la citad novelegì duai sa fatschantar cun las finanzas.

Il pachet da mesiras preschentà l'avust ha cumpiglià 101 mesiras. Quellas duessan reducir ils custs annuals per 8 milliuns francs ed augmentar las entradas per 8 milliuns francs. RTR ha gia rapportà:

Reacziuns dal Cussegl grond

Las partidas da pol, questas da la dretga e sanestra, èn avant l'inscunter dal parlament s'exprimidas cunter las mesiras da spargn da la citad da Cuira. Quai mussa la reacziun da deputads e deputadas dal Cussegl grond che stattan a Cuira.

Anita Mazzetta da la Verda era schoccada. Ella na vesa betg la necessitad e di, che las finanzas da Cuira na sajan betg uschè nauschas.

Era Tina Gartmann-Albin da la Partida socialdemocratica era schoccada. Surtut che la citad vul spargnar tar las scolas, tar la cultura ed en il sectur social. La deputada dal Cussegl grond na chapescha betg che la citad bajegia vinavant e suenter duai vegnir spargnà sin la goba dal public.

Tenor Mario Cortesi da la Partida populara svizra sajan las investiziuns nunponderadas dals ultims onns la culpa. E questas mesiras da spargn èn uss il resultat.

Vera Stiffler da la Partida liberaldemocratica, Tino Schneider da l'Allianza dal Center e Jürg Kappeler da la Partida verd-liberala sustegnan da principi ils plans da spargnar. Jürg Kappeler di, che sin Cuira spetgan grondas investiziuns. Per ch'i na dettia naginas situaziuns malempernaivlas duain ins cumenzar a spargnar, quest tema na sparescha numnadamain betg en il futur.

Il deputà Tino Schneider e la deputada Anita Mazzetta mettan anc en dumonda il mument cura che questas mesiras èn vegnidas preschentadas: trais mais avant che la suprastanza sa mida. Anita Mazzetta di ch'i fiss il pensum da la nova regenza da decider tge far cun las finanzas.

Demonstraziun a Cuira

La gievgia èn sa radunads passa 300 demonstrantas e demonstrants cunter las mesiras da spargn. Davant la chasa communala han els pretendì da desister sin quellas mesiras.