La citad da Cuira ha elavurà in pachet da mesiras per las investiziuns dals proxims onns. La raschun è che las investiziuns planisadas sajan memia autas, cumpareglià cun il gudogn che vegn a resultar.
Era tar las scolas vegn duvrà il culli cotschen per spargnar durant ils proxims onns
Las mesiras planisadas mussan cleramain l'idea da la citad. En tuttas trais scolas superiuras a Cuira (Quader, Giacometti, Florentini) duess mintgamai ina classa vegnir stritgada. Las classas vegnan uschia pli grondas: Var 20 scolaras e scolars en ina classa secundara e fin 20 en la reala. Entras questas mesiras vegnissen dal 2026-2028 var 510% plazzas da lavur stritgadas.
Vilà ed era trumpà è Paul Loretan, co-president da l'uniun da magistraglia a Cuira. Tenor el perdan las classas uschia qualitad ed era las scolastas e scolasts stuessen vegnir a frida cun dapli squitsch. Gia uss sajan las classas numnadamain pulit grondas en la superiura.
Quai è schon grond tubac. Suenter stuain guardar sche nus avain ils scolasts che restan sche las classas han 2-3 scolars dapli.
Paul Loretan dat sez era scola superiura en la scola Quader. Gia uss haja la citad per part bregias da chattar avunda scolastas e scolasts. Cun questas finamiras vegniss la situaziun anc pli tendida, è el persvas. In student che vegnia frestg da la scola da pedagogia studegia forsa duas giadas sch'el duaja vegnir a Cuira a dar scola, nua che las classas sajan uschè grondas.
El na pretenda betg che las scolas stoppian vegnir laschadas da la vart sch'i giaja per il spargnar. Ma el spera ch'il culli cotschen na vegn betg duvrà uschè intensiv sco previs.
Instituziuns n'han anc betg ponderà tge far
Sper la scola datti er anc autras instituziuns u uniuns che ston spargnar tenor ils plans da la citad. Pertutgà fermamain èn era contribuziuns da cultura, per exempel da differents museums chantunals. Envers RTR n'ha dentant nagin vulì s'exprimer en chaussa. L'Uffizi da cultura dal Grischun ha ditg ch'ins vegnia a persequitar spanegià las discussiuns en il paralament communal il settember.
