Ils ultims 10 onns è adina resultà in gudogn. Plinavant aveva la citad da Cuira pudì purtar bunamain tut las investiziuns cun agens meds. Il 2024 quintan ins anc cun finanzas saunas, pia che be 32% da la facultad da 982 milliuns francs è chapital ester. La planisaziun dals onns 2024-2031 mussia dentant ch'ins stoppia prender si bler dapli daners.
Almain 70% da las investiziuns ston vegnir finanziadas entras agens meds
Tenor la decisiun dal parlament da Cuira ston a partir dal 2026 almain 70% da las investiziuns vegnir finanziadas entras agens meds. Plinavant aveva il parlament decis la quota da l'agen chapital da 60% fin l'onn 2027. Il gudogn actual na tanschia dentant betg da finanziar tut las investiziuns futuras. Senza mesiras possian questas investiziuns be vegnir finanziadas entras chapital ester, uschia che la cumpart d'agens meds da 70% vegnia sutpassada. Vitiers vegnia er anc ch'ils custs da bajegiar s'augmentian pli e pli fitg.
Finamira è da meglierar quint per 16 milliuns francs mintg'onn
Las investiziuns tranter il 2024 ed il 2028 sa movan tranter 52 e 60 milliuns francs. Malgrà questas investiziuns equilibradas, quintan ins che la quota da l'agen chapital sa sbassa fin il 2028 sin 53% e la cumpart dals agens meds sin 16%. Per far frunt a quest svilup ha la suprastanza definì la finamira da meglierar il quint per 16 milliuns francs mintg'onn.
Uschia hajan ins analisà las expensas e las entradas da tut ils departaments e guardà nua ch'ins pudess spargnar e nua augmentar las entradas. Il focus saja stà sin la purschida da prestaziuns e betg primarmain sin custs da persunal. Quests 16 milliuns francs mintg'onn veglian ins cuntanscher entras reducir ils custs per 8 milliuns ed augmentar las entradas per 8 milliuns francs.
Uschia ha la suprastanza preschentà al parlament in pachet da mesiras che cumpiglia en tut 101 mesiras da tut ils departaments. 82 da quellas po la suprastanza decider, 19 mesiras èn en la cumpetenza dal parlament e 7 da quellas vegnan lura suttamessas al pievel da votar.
Big Air, taxa da giasts, taglia sin immobiglias ...
Crair vidlonder sto tranter auter il Big Air, là vul la citad reducir mintg'onn las contribuziuns. Plinavant duai la taxa da giasts vegnir auzada, sco era la taglia sin immobiglias. Ultra da quai duai en avegnir il chantun manar la stanza da consum da Cuira e betg la citad.
