Nova Stadthalle a Cuira - Tgi paja propi?

Sco la nova Stadthalle duai guardar ora è en sasez gia cler. Or d'ina occurrenza è vegnì tschernì d'experts il project il pli favuraivel. Era nua e cura che quella duai vegnir fabritgada è cler. La nova Stadthalle vegn a l'ur da la citad da Cuira, sper ils indriz da sport, sin l'areal da l'Obere Au. Las lavurs duain cumenzar il matg 2024. Pertge sin il pli tard il 2025 vegn la veglia Stadthalle stgarpada giu, lezza sto numnadamain far plazza a la staziun a val Brambrüesch.

Visualisaziun da la nova Stadthalle

Tge ch'è dentant anc betg cler è sche la nova Stadthalle po vegnir fabritgada, pertge emprim sto la populaziun dir Gea ad ina contribuziun annuala da 560'000 francs che va a la Stadthalle Chur AG. La gronda part dals custs duai la Stadthalle Chur AG purtar sezza. Ils daners or da la contribuziun annuala èn qua per pajar tschains ed amortisaziuns. Qua ina survista da la finanziaziun:

Entras quai che la Stadthalle Chur AG finanziescha il nov bajetg duajan ils custs avair nagin'influenza sin ils projects e las investiziuns da la citad da Cuira dals proxims onns. Cunquai che la citad da Cuira na vul betg investir bler dapli che 60 milliuns ad onn. Dentant sch'ins guarda pli precis, tutga la Stadthalle Chur AG per 96% a la citad da Cuira.

Grazia al fatg che quai vegn dentant pajà tras la Stadthalle Chur AG ha quai nagina influenza sin las investiziun da la citad ed uschia cumparan quests custs sulettamain en furma da quest mez milliun en il quint da gudogn e perdita da la citad. A lunga vista saja quai sco in'amortisaziun ch'ins stuessia resguardar, uschia il president da la citad Urs Marti. Per il mument distgargia quai dentant il quint d'investiziuns da la citad da Cuira.