Madrisasolar ha procurà per dumondas, ed uschia han tschintg cussegliers da vischnanca – tranter auter ils presidents da fracziun da la PLD, la PPS ed il Center – inoltrà in'interpellaziun cun 14 dumondas. La suprastanza communala ha lura gì da dar pled e fatg al parlament. Ils interpellants han mess en dumonda per l'ina l'augment da custs d'almain 25 milliuns francs, la rentabilitad dal project sco era la participaziun «nunspetgada» da las Ovras electricas da Turitg EKZ.
Plitost ina stimaziun ch'ina summa fixa
Il president da vischnanca Hans-Ueli Roth ha prendì posiziun e ditg, ch'il pretsch oriund – pia ils 40 fin 45 milliuns – saja plitost stà ina stimaziun. Ils 70 milliuns francs sajan ina summa fixa che sa resultia or da differentas offertas. Malgrà che l'ovra vegnia pli chara na sa midia la cumpart da la vischnanca da Claustra dentant betg. Lezza stoppia era vinavant pajar ils 4 milliuns sco planisà, e da lezzas uras approvà a l'urna. Plinavant restian las subvenziuns da la Confederaziun da 60% sin l'entira summa, perquai che Madrisasolar fetschia part dal Solarexpress.
Ovras electricas da Turitg sa participeschan nunspetgadamain
Sper la vischnanca da Claustra sa participescha era il concern d'electricitad grischun Repower vi da l'indriz. Quel n'è dentant betg responsabel per vender l'electricitad che l'ovra solara producescha. La raschun: La Repower na pudess betg garantir da vender tut l'electricitad producida a l'atgna clientella. Uschia ch'ella stuess vender quella a la bursa d'electricitad – e quella fatschenta da ristg pudess chaschunar ina sperdita. Perquai ha la vischnanca da Claustra ussa chattà in'ulteriura partenaria: las Ovras electricas da Turitg. Era sche quest'interpresa è pir vegnida vidlonder pli tard – pia suenter la votaziun il 2023 – saja quai capità a moda correcta. Els n'hajan mai excludì la pussaivladad d'integrar insacura in'autra interpresa, di Hans-Ueli Roth.
Betg dal tut cler sch'i dat ulteriuras intervenziuns
Malgrà che Hans-Ueli Roth insista ch’els hajan lavurà schuber e betg fatg sbagls en connex cun Madrisasolar, chapescha el l’intschertezza che regia tar intgins ed intginas. Cunzunt perquai ch'il project vegnia in ton pli char che spetgà. Ins stoppia ussa guardar co i giaja vinavant. Ina nova votaziun n'è tenor el dentant betg necessaria – era sch'ils interpellants avevan menziunà questa pussaivladad. Quai hajan era trais giurists analisà e confermà.
Il bal è ussa tar il parlament da Claustra u tar la cumissiun da gestiun – co e sch'i dat anc intervenziuns tar il project u sch'i va uss vinavant sco planisà. La finamira resta dentant tuttina: Madrisasolar duai esser a fin sin il november 2027, e lura porscher electricitad a 3'500 chasadas.
