Cun l'implant che producescha fin 350 tonnas idrogen verd possia vegnir spargnà mintg'onn fin 1,5 milliuns liters diesel, communitgeschan l'Axpo e la Rhiienergie Grischun.
Cun sia colliaziun directa cun in'ovra idraulica produceschia l'implant en moda neutrala al clima e saja uschia in project da piunier. Il carburant che vegn producì vegn directamain elavurà en l'implant, uschia che quel po vegnir transportà pli simpel tar ils tancadis e la clientella d'industria.
I dat anc da dumagnar in pèr obstachels, ma l’Axpo è persvasa dal potenzial dal purtader d’energia verd, persistent e regenerabel.
L’implant a Domat è vegnì inaugurà il venderdi cun represchentantas e represchentants da la politica e da l’economia.
Axpo vul far vinavant cun projects d'idrogen
L’idrogen verd tutga tenor l’Axpo cunzunt en il sectur da l’industria e mobilitad tar ils impurtants furniturs d’energia favuraivels al clima e saja in element central en connex cun la decarbonisaziun. L’idrogen pudess en l'avegnir giugar ina pli e pli impurtanta rolla per segirar il provediment d'energia.
L'Axpo vul far vinavant cun tecnologias d'idrogen. Ensemen cun la societad da navigaziun dal Lai dals Quatter Chantuns planisescha il concern d'energia l'emprim bastiment da passagiers che funcziuna cun «idrogen verd» da l'Axpo. Era sa participeschian ins a projects d'idrogen en Frantscha ed en l'Italia.
Mulegns politics mulan plaun
L'ovra d'idrogen a Domat è naschida sin iniziativa ed er cun daners privats da l'Axpo e la Rhiienergie. Davart da chantun e confederaziun n'hai dà nagin sustegn finanzial. Sper quai na datti er anc nagina strategia d'idrogen dal Cussegl federal. Quella è pir en lavur, suenter che Martin Candinas ha fatg ina moziun correspundenta. Tenor el saja impurtant che la Svizra collavura er cun auters pajais ch'èn gia pli lunsch quai che pertutga l'idrogen.
Jau crai nus essan qua a l'entschatta a na savain betg nua che la via maina. Quai che nus savain è che nus vulain decarbonisar, che nus vulain dapli energias regenerablas e qua èsi cler che l'idrogen vegn a giugar ina tscherta rolla – tgenina ch'igl è vegn a sa mussar.
Nua che la via maina saja uss dentant anc grev da dir cunquai che la tecnologia sa sviluppa pli e pli. Er la collega da partida e ministra da d'energia dal chantun Carmelia Maissen è stada a l'avertura da l'ovra – er per ella è l'ovra in impurtant pass per il svilup da questa tecnologia.