La svieuta dal concern d'energia Axpo è s'augmentada sin 10,5 milliardas francs l'onn 2022, envers 6,1 milliardas francs l'onn avant. Quai pervi dals auts pretschs d'energia, scriva l'Axpo. Il gudogn è durant la fasa fitg turbulenta dentant sa reducì levamain da 607 milliuns sin 594 milliuns francs. Perquai che la Confederaziun ha mess a disposiziun ina lingia da credit da 4 milliardas francs na paja l'interpresa naginas dividendas. L'Axpo n'ha dentant anc betg fatg diever da quest fond d'urgenza.
Per prestaziuns da garanzia per la producziun a la bursa d'energia ha il concern stuì investir 3,1 milliardas francs – passa trais giadas uschè bler sco il 2021. Quai èn segirezzas che vegnan duvradas perquai che la producziun da forza electrica vegn vendida fin trais onns ordavant. Cura l'electricitad empermessa vegn lura furnida, turnan quels daners puspè tar l'interpresa.
