Il chantun Grischun ha survegnì la lubientscha da construcziun da la citad da Cuira. El ha dumandà per la lubientscha da bajegiar per il nov center da la Scola auta spezialisada dal Grischun FHGR. Planisà è da cumenzar a bajegiar il center a Cuira la primavaira 2025.
L'avertura è planisada per l'onn 2028. Las lavurs preparatoricas sin l'areal Pulvermühle a Cuira han cumenzà gia avant intginas emnas. Tranter auter vegnan bajetgs existents spazzads ed il Mühlbach spustà.
