Il Cussegl grond ha deliberà il credit senza cuntravusch l'october passà. En tut planisescha il chantun investiziuns da 178 milliuns francs (151 milliuns dal chantun e 27 milliuns da la Confederaziun). Quai fiss il pli char project ch'i ha dà en il Grischun fin ussa.
Daco dovri in nov campus?
Ils ultims onns èn il dumber da studentas e students, sco er il volumen da perscrutaziun creschids cuntinuadamain a la FHGR. Perquai ha la scola stuì fittar adina dapli stanzas ordaifer l'atgna scola. Oz ha la Scola auta spezialisada dal Grischun total tschintg lieus nua ch'i vegn instruì e lavurà en la citad da Cuira. En quests lieus manca dentant il plaz per pudair extender e sviluppar la scola. Per pussibilitar il svilup a la scola ha il Cussegl grond decidì il 2018 da realisar il center per la FHGR a la Pulvermühle ed ha incumbensà la regenza da scriver ora il project.
Da realisar il center da la Scola auta spezialisada saja per il chantun da gronda muntada, quai or da vista politica da furmaziun, perscrutaziun ed innovaziun. La mancanza da persunal dal fatg, en spezial en disciplinas tecnicas e da las scienzas natiralas, engrevgeschia ad interpresas da sa sviluppar e crescher. En quest conturn saja la FHGR in impurtant actur, scriva la regenza. Quai per scolar persunas e promover il medem mument l'economia grischuna.
Pli char che previs
Bunamain la mesadad pli bler che planisà il 2018 duai il nov bajetg custar. La scola haja giavischà spazi supplementar da 3'150 meters quadrats, ha ditg il cusseglier guvernativ Mario Cavigelli tar la preschentaziun dal project la stad passada. Sch’ins investeschia, lura veglian ins far quai endretg. Ulteriurs motivs per ils custs pli auts sajan per l'ina la chareschia, e per l'autra ch'ils basegns tar ils meds d’informatica sajan creschids. Il nov bajetg stess a disposiziun a partir dal 2030.
La proposta n'è betg dispitaivla
