Qua sut suondan ils arguments per e cunter il barat da terrens avant che la nova stimaziun è vegnida enconuschenta.
Cuntravent per il barat da terrens
Cuira Vest saja tenor la citad da Cuira in spazi da svilup relevant. El haja ina gronda impurtanza per l'ulteriur svilup dal territori e per la creschientscha da la citad. Per garantir l'engrondiment da la staziun Cuira Vest e construir abitaziuns, saja il barat dals terrens tenor il president da la citad da Cuira Urs Marti in pass impurtant.
Uschia pudain nus construir pli svelt e nuncumplitgà a Cuira Vest.
En il rom da la fatschenta da barat surpigliass la citad da Cuira dus terrens da la «Societad da construcziun City West» cun ina valur totala da 1'385'650 francs e surdess a la «Societad da construcziun City West» in terren cun ina da 9'627'400 francs. Quest terren è gia surbajegià cun ina part dal center da cumpra City Vest. La «Societad da construcziun City West» prestass a la citad in pajament da cumpensaziun che resulta da la fatschenta da barat en l'autezza da 8'241'750 francs.
Il comité cunter quest project crititgescha, ch'i na sa tractia tar questa fatschenta betg d'in barat sco inditgà, mabain plitost d'ina vendita – e quai per prest trais milliuns francs sut la valur effectiva dal terren. Il pretsch da bundant otg milliuns che la «Societad da construcziun City West» avess da pajar, fiss be trais quarts da la valur da martgà che l'Uffizi chantunal per la valitaziun d'immobiglias aveva stimà il 2018. Tenor il president da la citad da Cuira Urs Marti sa tractia qua probablamain d'ina valitaziun memia auta da vart dal chantun. La citad ha laschà stimar il terren dad in'interpresa externa ed ha surpiglià questa valur sco basa per lur tractativas.
La citad regala pli u main trais milliuns a la «Societad da construcziun City West».
Ch'i sa tractia tar la fatschenta a la fin finala plitost d'ina «vendita» che d'in «barat», lascha Urs Marti valair. Ma tenor lescha dal dretg funsil stoppia uschespert ch'er mo ina part da la fatschenta saja in barat, l'entir affar vegnir numnà «barat», era sche la pli gronda part è atgnamain ina vendita.
Tenor il comité na fetschia a lunga vista per la citad er betg senn da vender terren, perquai che vischnancas stuessan plitost mantegnair el en temps da stgarsezza da terren. Vitiers perdess la citad er l'entrada dal tschains en dretg da construcziun en l'autezza da 145'000 francs per onn. Qua spetga Urs Marti dentant da pudair cumpensar quests tschains cun las entradas tras las novas parcellas.