Cun la primavaira turna era la vegitaziun e la vita. Quella dals ansiels-chavriel è dentant ferm periclitada cura ch'ils purs han da segar ils prads. Il 2018 ha – sin iniziativa privata e cun sustegn da l'Uffizi da chatscha – cumenzà en il chantun il salvament d'ansiels cun dronas. Singulas secziuns da chatscha, che fan part al project sin basa voluntaria, sgolan e controlleschan cun dronas uschia ils prads per ils purs. In team da gidanters marchescha e schurmegia lura l'ansiel cun ina harassa, uschia ch'il pur po segar.
La collavuraziun funcziuna fitg bain.
L'Uniun purila dal Grischun saja fitg engraziaivla per il sustegn dals chatschaders, di Thomas Roffler. Sco uniun possian els mo cussegliar a mintga pur da dumandar ils chatschaders per sustegn. En lur publicaziun «Pur Grischun» informeschan els era davart il project da salvament. Ina basa legala per in sustegn finanzial vi da la lavurs dals chatschaders n'existia betg – «In toc chaschiel u charn» saja dentant tenor Roffler il minimum ch'in pur duess dar als gidanters cun la drona.
Grond agid dals chatschaders
Responsabel per la protecziun dals animals èn tenor lescha ils purs. Uschia han lez l'obligaziun d'annunziar al guardiachatscha cura e nua ch'els segan ina parzella. Sch'i na vegn betg sgulà e controllà cun dronas, sto il pur controllar sez il prà u montar indrizs da spaventar ils animals mamma che pudessan plazzar ils ansiels en in prà. Per Adriano Dosch, il president da la secziun da chatschaders Surses, è lur lavur voluntaria in servetsch per il bun da tuts. Era sche l'Uffizi da chatscha mettia a disposiziun mintgamai per la stagiun ina drona, veglia la secziun ussa cumprar in'atgna: «Cun in'atgna drona essan nus pli flexibels e sin il pli nov stand da la tecnica».
Mintga ansiel salvà fa plaschair.
L'Uffizi da chatscha è cuntent
Or da vista da l'Uffizi da chatscha funcziuna il project da salvament cun dronas fitg bain. Per Catherine Frick, collavuratura academica da l'uffizi, saja la collavuraziun ora en las regiuns da grond'impurtanza. L'uffizi sappia bain metter a disposiziun als chatschaders dronas ed constantamain actualisar la flotta, la lavur voluntaria saja dentant il motor da quel project.
Tenor l'uniun «Rehkitzrettung Schweiz» daventan mintg'onn radund 1'500 ansiels unfrendas da maschinas da segar – il dumber zuppà è probabel bler pli grond. «Rehkitzrettung.ch» è in’uniun che sa cumpona da pilots da dronas en uffizi d’onur.
I sa tracta d’ina collavuraziun tranter chatschaders e purs che scolescha mintg’onn novs teams.