La strategia da la Svizra n'è betg la medema sco en l'Austria. Las restricziuns èn bler pli pauc severas e quai saja er bun uschia, manegia il minister d'economia dal Grischun Marcus Caduff.
Igl è ina strategia che na va betg cun il martè grond viaden, mabain emprova plitost da reglar quai cun il scalpel fin.
Ins stoppia dentant er vesair ch'ins na possia betg cumparegliar la Svizra cun l'Austria. Lezza saja numnadamain bler pli dependenta dals giasts da l'exteriur, cunzunt da la Germania, che la Svizra. Cun mesiras bler pli pauc strictas va la Svizra ina tut autra via che l'Austria. Tuttina n'ha Marcus Caduff betg tema per la stagiun d'enviern, er cunquai ch'el quinta cun giasts indigens.
Ma la finala dependa la stagiun d'enviern dentant betg mo dal svilup dal coronavirus. Mabain sco tar envierns normals er, da l'aura e da la situaziun da naiv.
