Legenda:
Daniela e Hans-Jörg Erlacher han ina pensiun a Tulfes.
MAD
cuntegn
Hoteliera rumantscha - «Il segund lockdown en l'Austria è la dretga decisiun»
Dapi ils 3 da november è il turissem en l'Austria en in segund lockdown – dapi ils 16 da november vala quel per l'entir pajais. La hoteliera rumantscha Daniela Erlacher ha tutta chapientscha per questa decisiun, cunquai ch'i saja stagiun bassa.
Sco hotel en ina regiun turistica na saja il segund lockdown betg uschè dramatic, cunquai ch'els avessan uschè u uschia gì serrà durant la stagiun bassa. Hotels en las citads e las stizuns che profiteschan da fieras e venditas avant Nadal tutgia questa mesira pli ferm, declera la hoteliera Daniela Erlacher.
Sche la decisiun da serrar hotels, ustarias, stizuns enfin ils 6 da december po salvar la stagiun d'enviern, na saja anc betg cler.
Nus na pudain betg spendrar la stagiun d'enviern – nus pudain dentant uss ina giada spendrar la stagiun da Nadal.
Quitads fa a la Sursilvana la malsegirtad: Ella na possia betg dir als giasts da vegnir, cunquai ch'i na saja betg cler sche quels dastgan insumma vegnir ubain sch'els ston silsuenter forsa ir en quarantina. La gronda part dals giast en lur hotel sajan tudestgs, raquinta Daniela Erlacher.
Daniela Erlacher
Avrir la boxSerrar la box
La Sursilvana è oriunda da Rueun e viva gia dapi 30 onns en Austria. Ensemen cun ses um Hans-Jörg maina ella in hotel a Tulfes en il Tirol – in manaschi da famiglia ch'els han entant midà en ina sort pensiun e fatg ord las chombras abitaziuns.
A Tulfes vivan 1'600 persunas – il territori da skis è pitschen e famigliar cun circa 25 kilometers pista.
