L'onn passà èn las trais destinaziuns Lai, il Partenz Anteriur e la regiun «Engiadina, Samignun e Val Müstair» ids sur ils cudeschs per chattar ora co s'adattar il meglier a la midada dal clima. Quai sut la batgetta da Grischun vacanzas ch'ha analisà cun persunas externas dal fatg il punct da partenza ord vista climatica e economica. Che la midada dal clima haja era consequenzas per il turissem saja evident, di Martina Hollenstein-Stadler ch'è la responsabla per il tema persistenza tar Grischun Vacanzas.
Sche destinaziun da vacanzas vulan daventar fittas en causa midada dal clima, lura dovri tenor ella dapli purschidas per l'enviern ch'èn independentas da la naiv. Uschia per exempel purschidas sco excursiuns e spassegiadas, hallas da raiver u plazzas da gieu sut tetg. Per l'autra possian destinaziuns pli fraidas era nizzegiar il trumf ch'i saja durant la stad pli frestg en las muntognas.
La stad vesain nus ina gronda schanza per las destinaziuns. Blers e bleras tschertgan era lieus pli fraids durant il temp da chaliras, ma vi da quai ston ins lavurar. Quai na gira betg da sez.
Sche destinaziuns sa preparan sin la midada dal clima muntia quai era ch'i saja da sa preparar per eveniments da la natira sco bovas u crudada da crappa. Uschia saja era essenzial per la stad ch'i dettia buns sistems d'infurmaziun per turistas e turists.
Tenor la responsabla per persistenza saja er impurtant ch'i dettia ina collavuraziun tranter las destinaziuns cun visiuns e plans a lunga vista. Per ella saja cler ch'i dovria in lung flad sch'i va per las sfidas che la midada dal clima portia per il futur.
S'adattar al clima è in maraton, quai n'è betg in sprint. Quai vegn anc a fatschentar ils proxims onns fitg. Ed i vala era dad esser flexibel.
Cun quest project saja il Grischun en cumparegliaziun cun autras destinaziuns en ina rolla da piunier en cumparegliaziun cun autras destinaziuns da muntogna. Ins sa preparia uschia proactivamain sin las novas realitads en il turissem da muntogna, uschia Grischun Vacanzas.