La Viafier retica vul cumprar quatter novs simulaturs per emprender da manischar ina locomotiva. La Viafier retica posseda gia simulaturs. Ils vegls èn dentant vegnids vegls e na simuleschan betg tuttina bain sco ils novs models. Latiers vegn ch'ils novs simulaturs duajan schliar problems ch'i dat actualmain cun la scolaziun. Pertge sin las lingias da la Viafier retica datti adina dapli plazzals cun sanaziuns da punts, tunnels, staziuns u lavurs vid las lingias dal tren. Quellas lavurs capitan il pli savens durant la notg, pia lura cura ch'era las scolaziuns per locomotivists e locomotivistas han lieu. Vitiers vegn ch'i dat per il mument ina mancanza da locomotivists e locomotivistas, quai vul dir ch'ins sto scolar dapli persunas.
Cun novs simulaturs avain nus la pussibilitads da far pli effizient la scolaziun per locomotivistas e locomotivists e quai cun la medema qualitad e segirtad.
La Viafier retica quinta da prender en funcziun l'emprim dals en tut quatter simulaturs l'atun. Sco la Viafier retica ha communitgà envers il schurnal regiunal dad SRF sappian ins anc betg quant ch'ils simulaturs custian, ins saja anc vid la procedura da publicaziun. Ins quinta dentant cun enturn 500'000 francs.
