Pervi da la mancanza da locomotivistas e locomotivists sto la Viafier retica il davos temp mintgatant stritgar in tren u l'auter. Per ordinari cursescha il proxim tren puspè tenor plan, sche quel vegn aifer ina mes'ura èsi tenor la pledadra da la Viafier Retica Yvonne Dünser, supportabel per passagieras e passagiers da spetgar sin quel. Per ordinari vegnian sper quai er organisads bus da remplazzament. Normals bigliets restan er valaivels per proxims trens. Auter guarda quai or tar bigliets da spargn, quels valan be per il viadi cudeschà ed ins sto cumprar in nov bigliet. Tenor Yvonne Dünser, vegnan ils daners dentant restituids.
Tge far sche las infurmaziuns mancan?
Normalmain infurmescha la Viafier retica via moniturs d'infurmaziun, via l'app da la SBB e sur ils autpledaders en las staziuns. Sch'i na dat naginas infurmaziuns cusseglia Yvonne Dünser da prender si contact cun il persunal a la staziun, quel gidia lura vinavant. Sch'igl è ina staziun senza persunal, lura dat quai sin las tavlas d'infurmaziun in nuf ch'ins po smatgar e che collia lura cun la centrala a Landquart. Il persunal là gida lura vinavant. Er sch'i fa prescha ed ins dovra per exempel in taxi, duai ins tenor la pledadra exnum prender si contact cun il persunal e betg sez organisar insatge.
En general emprovia la Viafier Retica da'insumma betg stritgar trens e sche necessari lura plitost da quels che n'èn betg uschè frequentads.
