La regenza grischuna ha nominà Ueli Caduff da Morissen sco cumissari per la vischnanca. El è anteriur president d'ina da las vischnancas fusiunadas. Cunquai che la suprastanza n'è betg pli cumpletta dapi las elecziuns passadas poi dar la situaziun ch'ella na po betg far decisiuns. Per prender decisiuns ston tenor lescha chantunala almain tschintg persunas da la suprastanza esser preschentas – manca ina da las tschintg persunas è la suprastanza bloccada. L'incumbensa d'Ueli Caduff è pia da pussibilitar che la suprastanza da Lumnezia po vinavant prender decisiuns valablas, scriva il chantun. Plinavant sustegnia el la vischnanca da Lumnezia da recrutar novas persunas per ils sezs vacants. Ses mandat sco cumissari scroda il pli tard la fin dal 2028.
L'emprim da schaner 2013 è vegnida realisada la fusiun dad otg vischnancas a la nova vischnanca da Lumnezia. Dapi la fusiun dal 2013 èsi adina stà pussibel da chattar nov commembras e commembers da suprastanza per las periodas d'uffizi, schegea che betg tut ils vischinadis han adina fatg diever da lur dretg d'esser represchentads en la suprastanza communala. Dapi las elecziuns dal settember 2024 n'è la suprastanza dentant betg pli cumpletta – be 5 da 9 sezs han pudì vegnir occupads.
Giavisch da reducir dumber da sez en suprastanza
En il contract da fusiun da l'onn 2013 è vegnì fixà che mintga anteriura vischnanca ha il dretg d'in sez en la suprastanza communala da nov commembers. Quest contract po il pli baud vegnir adattà 15 onns suenter la fusiun – pia pir a partir dal 2028. Ultra da quai dovri ina maioritad qualifitgada da dus terzs da las votantas e dals votants.
Ils nov sez da suprastanza han procurà per disscussiuns intensivas durant il process da fusiun. Ins era conscient da la problematica d'ina suprastanza cun blers commembers, vuleva dentant desister d'in parlament e tuttina integrar las vischnancas vertentas en la nova vischnanca. Igl è vegnì desistì sapientivamain d'ina limitaziun temporara da la perioda d'uffizi d'ina suprastanza che sa cumpona da nov persunas.