En la suprastanza da la vischnanca Lumnezia è in sez anc vacant, cunquai che nagin è sa mess a disposiziun tar l'elecziun avant rodund duas emnas. La vischnanca preveda l'elecziun per quest sez puspè l'atun da quest onn. En general fissi impurtant da pudair occupar quest post, perquai ch'il sez betg occupà è ina part d'in pli grond problem: il grond dumber da sezs en suprastanza.
La vischnanca Lumnezia aveva francà il dumber da nov suprastantas e suprastantas en il contract da fusiun da l'onn 2013 e quai senza inditgar ina limita da temp per far midadas eventualas. Uschia è ella liada tras l'artitgel da la lescha da vischnancas che preveda in term da minimum quindesch onns per pudair far quest. En il cas concret da la la vischnanca da Lumnezia po la suprastanza vegnir reducida sin il pli baud l'onn 2028. Il chantun aveva gia èn il 2017 refusà la dumonda da la vischnanca da d'astgar reducir il dumber da nov sezs sin tschintg.
La populaziun aveva gea mussà cun la votaziun il 2016 ch'ella vul er questa reducziun da sezs en suprastanza.
Gia èn l'emprima legislatura suenter la fusiun aveva la vischnanca Lumnezia constatà ch'igl è grev da chattar persunas per la suprastanza communala. Il problem n'è cun ils onns betg daventa pli pitschen.
La suprastanza actuala è en contact cun l'Uffizi da vischnancas ed ella vul quest onn anc ina giada inoltrar ina dumonda tar il chantun d'astgar reducir la suprastanza da nov chaus sin tschintg. Thomas Kollegger, il manader da l'Uffizi da vischnancas na vesa pauca speranza per ina resposta positiva. La suprastanza cun nov sezs saja stada in argument politic da chattar ina maioritad per la fusiun avant passsa 10 onns.
Il temp ch'è en la lescha è da respectar.
Per consequenza sto la vischnanca Lumnezia anc viver cun questa ierta per las proximas duas legislaturas. En in onn e mez duess il suveran lumnezian puspè eleger ses nov suprastants, sch'i chattan avunda candidatas e candidats. Da la suprastanza actuala ston trais chalar, cunquai ch'els cuntanschan cun trais periodas la limita d'uffizi.
Or da l'archiv:
