Tschintg persunas candideschan per nov sezs en la suprastanza communala da la Lumnezia. Duas da quellas persunas èn novas, tschellas trais èn gia dapi quatter onns en il gremi. Sco ch'il president communal Daniel Solèr ha confermà envers RTR candideschan:
- Daniel Solèr, president communal (en uffizi)
- Martin Sgier (en uffizi)
- Gian Caduff (en uffizi)
- Erwin Capeder (nov)
- Daniel Blumenthal-Lombris (nov)
Da la suprastanza actuala han dus commembers demissiunà, trais na dastgan betg pli candidar pervia da la limitaziun da temp d'uffizi. Il termin d'inoltrar novas candidatura è scadì. Pervia dal e-voting, pia l'elecziun cun meds electronics, è il process da candidar per in post gia dapi ils 21 da fanadur a fin. Uschia na tschertgia la vischnanca per il mument betg ulteriuras candidatas e candidats, di Daniel Solèr.
La suprastanza communala ha gia en questa legislatura lavurà cun 8 enstagl da 9 suprastants. Per esser abla d’agir dovria la suprastanza 5 persunas, uschia il president. Prender decisiuns po la suprastanza dentant mo, sche tut ils 5 suprastants èn preschents tar las sesidas.
Nus da la vischnanca avain gea adina gì l’intenziun da reducir quest dumber da suprastants sin tschintg. Uss avain nus tschintg.
Il giavisch per l’avegnir fissi, da reducir il dumber da sez da 9 sin 5 suprastants. Il contract da fusiun che stipulescha 9 persunas en la suprastanza è enfin la fin da l’onn 2028 liant. Per il manader da l’Uffizi da vischnancas, Thomas Kollegger, èsi cler che la vischnanca sto tschertgar vinavant persunas per occupar tut ils posts.
Entschaiver pon ins uschia, ma suenter ston els, per lur agen interess, chattar uschè spert sco pussaivel avunda glieud per respectar la constituziun.
In exempel: Sch'in suprastant sto s’abstegnair tar ina fatschenta, n'è la suprastanza betg pli abla d'agir. Per ch'i saja insumma pussaivel da cumenzar la proxima legislatura, ston tut ils candidats er vegnir elegids. Lura vuless Daniel Solèr entschaiver da reparter las lavurs sin tschintg departaments, sco era cumenzar cun las lavurs da reveder la constituziun.
