Local da consum - Contract è suttascrit – uss è la balla tar il chantun

Il cumenzament avevi num ch’il local da consum per persunas dependentas duai vegnir realisà tranter l'onn 2024 e 2026 a Cuira. Sco ch'i para èn la citad ed il chantun sin buna via. Intginas chaussas ston dentant anc vegnir fatgas. Suenter ch’il lieu è vegnì midà da la Sägenstrasse en il Welschdörfli hai da nov dà cuntravent cun chartas da lecturs e lecturas ed era cun petiziuns. L'incumbensa da chattar in lieu ed era da communitgar cun ils vischins e vischinas è l’incumbensa da la citad Cuira. En pli è ella responsabla per la part dal local da consum. Il contract da locaziun haja la citad schon suttascrit la stad passada per tschintg onns, cun pussaivladad da prolungar.

Il chantun percunter ha prendì en maun il post da contact e cussegliaziun che vegn sut il medem tetg sco il local da consum. Là duessan las persunas dependentas survegnir agid e cussegl ed era avair la pussaivladad da mangiar u far la duscha. Da cumbinar questas duas parts saja in punct impurtant per ch’il local haja era success – quai hajan autras citads cusseglià. La gestiunaria vegn l’uniun d'agid per surviver Grischun ad esser. Questa uniun maina gia l’emprim post a Cuira ch’è integrà en l'alloschi d’urgenza. La dumonda là saja stada gronda ed uschia vuleva il chantun schlargiar questa purschida.

Sco proxim pass decida la regenza grischuna davart la finanziaziun per l’uniun agid per surviver che gestiunescha il local. Suenter vegn alura il permiss da fabrica. Trais players – l’uniun, la citad ed il chantun – èn vidlonder da realisar il local da consum ed il post da contact.

Nagin local da consum a la Sägenstrasse

La fin d'october èri cler: Il local da consum per dependents e dependentas da drogas a Cuira na duai tuttina betg vegnir realisà a la Sägenstrasse, mabain en il Welschdörfli en l'anteriur club «Palazzo». Patrik Degiacomi, il suprastant da la citad, di ch'i dat en mintga lieu cuntravent sch’ins vul far in tal project. Dentant na saja quai betg stà il motiv principal per la midada da plan. Il nov local saja pli datiers a la scena en il Stadtpark, quest lieu sa chatta en ina zona maschada e betg en ina zona d’abitar.

Plinavant na datti nagina plazza da gieu u in auter indriz per uffants al nov lieu. Ma tuttina passan era là atras uffants per ir en la scola Türligarten. Las abitantas ed ils abitants dal Welschförfli na sajan per part era betg
d'accord. Els sajan gia pertutgads da la vita da notg en il Welschdörfli. Tuttina hajan ils abitants e las abitantas era chapientscha che la citad preferescha quest lieu, di Patrik Degiacomi.

Auter lieu, medem pretsch

En il quartier da la Sägenstrasse avevi dà resistenza . Abitantas ed abitants avevan tranter auter crititgà la vischinanza dal local tar ina plazza da gieu. Auter che la dumonda dal lieu è il local da consum sez betg dispitaivel. Il zercladur avevan ils da Cuira ditg cleramain «Gea» al project da pilot da 4 milliuns francs. Quest credit na stoppia betg vegnir adattà pervia da la midada dal lieu. En in proxim pass dovra la citad ina lubientscha da la regenza e suenter ina lubientscha da fabrica. Patrik Degiacomi di ch'i na saja betg pussaivel d'avrir il local da consum avant la proxima stad.

Reacziun d'abitants e possessuras d'affars: