La lavur sin via duai cuntinuar. Perquai vul la regenza surpigliar il project da pilot «Streetwork» da la citad da Cuira. I sa tracta d'ina purschida che sa drizza activamain a persunas che n'arrivan sezzas betg da far diever d'autras purschidas d'agid. Lavureras e lavurers socials inscuntran en il spazi public persunas pertutgadas e gidan tranter auter a reducir ils problems psichics, fisics e socials.
En in lieu pli central a Cuira vul la regenza en pli stgaffir in nov e pli grond post da contact e consultaziuns. Tgi ch'è dependent duai pudair sa trategnair là en in lieu protegì ed er profitar da purschidas d'agid. Plinavant vul la regenza meglierar las purschidas da l’abitar assistì.
Tar l'examinaziun tras dus rapports ha la regenza giuditgà ultra dal basegn er ils custs e la realisabladad da las mesiras. Per realisar las purschidas sto il Cussegl grond augmentar dal 2022 preventiv cun ulteriurs 400'000 francs.
Nagin local da consumar
Ad interim na datti en Grischun però nagina stanza per consumar drogas, ch'era giavischada da la vart da la citad da Cuira, persunas dal fatg sco er da diversas deputadas e deputads dal Cussegl grond. L'emprim veglian ins observar l'effect dal nov post da contact e da consultaziun, avant che far ulteriuras investiziuns, hai num en la communicaziun.