«L'ultim Rumantsch» - In sguard davos las culissas da «L'ultim Rumantsch»

Per preparar in set da film dovri bundant 20 persunas. Tranter auter da quels che installeschan la tecnica sco las cameras, las glischs u era las decoraziuns, ma era in’artista da make-up che prepara tut ils acturs ed las acturas è sin il set da film da la seria rumantscha.

Dis lungs ma fitg satisfaschants

Per Livia Solèr, ina da las duas artistas da make-up cumenzan ils dis da lavur al set da «L'ultim Rumantsch» baud. Tranter las 06:00 e las 08:00 la damaun èn ellas en acziun e quai per il solit sco emprimas sin il set. Pauc suenter arrivan ils acturs e las acturas che Livia Solèr e sia collega preparan per las scenas dal di. Il di da nossa visita n'han las duas artistas da make-up betg stuì esser uschè baud al set – ellas han be gì da preparar dus acturs. Las scenas ch'èn vegnidas filmadas quai di giogan tuttas il medem di. Quai munta, ch'il make-up n’ha betg stuì vegnir midà, mabain be rinfrestgà sch'i fa basegn.

Per vesair tge ch'è da far u co smincar sto Livia Solèr guardar tras ils visurs sparpagliads sin tut la plazza. Quels visurs mussan ils purtrets che la camera da film registrescha actualmain. Uschia vesa ella subit, sch'insatge vi da l'actur n’è betg sco quai ch'i stuess esser.

Mintgin è impurtant

Per blers commembers e commembras dal team da producziun è la pli impurtanta persuna il reschissur. Per Adrian Perez – il reschissur ed in dals scripturs da la seria – èn però tut las persunas involvidas fitg impurtantas:

El sa vesa plitost sco in dirigent d’orchester che sto esser pront e funcziunar sin il punct. Metter en funcziun la tecnica, il make-up, far pront la scena, ils costums e controllar la registraziun durant sco era suenter la filmada saja dentant almain uschè impurtant. Tenor Adrian Perez sajan tut las persunas involvidas sin il set fitg engaschadas da pudair garantir ina producziun buna ed effiziainta.

Per guardar: stafla 1

Avant che la cuntinuaziun da «L'ultim Rumantsch» è pronta, pudais guardar co tut ha cumenzà.

Or da l'archiv:
Er il Minisguard ha visità in di il set da L'ultim Rumantsch, però durant ina filmada en la chasa da medias da la Somedia a Cuira.