Quai è capità: Il glindesdi Pasca ha Klaus Schwab annunzià surprendentamain da sa retrair sco parsura dal Forum mundial d'economia (WEF). Il fundatur dal WEF che ha adina lieu a Tavau ha fatg quai senza inditgar ina raschun. La notg sin la mesemna ha la gasetta americana «Wall Street Journal» rapporta, ch'il WEF haja instradà in'inquisiziun encunter Schwab. La raschun è ina brev anonima a la suprastanza dal WEF, che Schwab e sia dunna duain avair profità sin donn e cust dal Forum mundial d'economia.
Renfatscha da l'abus da pussanza: La brev anonima ch'è arrivada l'emna passada tar il cussegl da fundaziun dal Forum mundial d'economia, vegn para d'emploiads actuals ed anteriurs dal WEF, sco il redactur d'economia da SRF Sven Zaugg di. En la brev hai num tenor il «Wall Street Journal», ch'i haja dà sur onns surpassaments da guvernanza sistematics ed abus da pussanza. A Schwab vegn renfatschà in depurtament da manar dispitaivel, cunzunt en il contact cun emploiadas. Per Klaus e Hilde Schwab vala la presumziun d'innocenza.
Renfatscha da l'enritgiment: Klaus Schwab e sia dunna Hilde duain avair fatg giu quint viadis da luxus privats via il WEF. Vitiers duain els avair nizzegià parzialmain exclusiv ina immobiglia al Lai da Genevra, cumprada dal WEF. Quai rapporta il «Wall Street Journal». La villa duai avair custà radund 30 milliuns dollars, e per radund 20 milliuns hajan ins laschà far renovaziuns. Klaus Schwab duai era avair empustà massaschas en chombras da hotels, sin custs dal Forum mundial d'economia.
Uschia ha reagà Klaus Schwab: Il fundatur dal WEF ha inoltrà la mesemna ina denunzia penala cunter nunenconuschent, sco el ha confermà envers SRF. La famiglia Schwab constateschia ch'ella sa distanzieschia da las accusaziuns. Ed ella deploreschia ch'il fundatur dal WEF sez na saja betg vegnì tadlà dal cussegl da fundaziun dal WEF.
Donn incalculabel: Las relaziuns tranter il cussegl da fundaziun dal WEF e Klaus Schwab paran d'esser lavagadas totalmain. Quant grond ch'il donn è, e sch'i dat insumma in, na saja il mument anc betg enconuschent, di Sven Zaugg da SRF. Almain saja il cussegl da fundaziun sa radunzà la dumengia Pasca ad ina seduta da crisa, in di avant che Schwab è sa retratg andetgamain. Para vuleva Schwab sa defender durant questa seduta, n'ha dentant chattà nagina chapientscha. In pledader ha ditg tenor rapports da medias, che Schwab n'haja mai gì la pussaivladad d'explitgar envers il cussegl da fundaziun u dal gremi d'examinaziun sia vista.
Il WEF – quai era Klaus Schwab: «Per decennis era Klaus Schwab il WEF», di il redactur d'economia Andreas Kohli da SRF. El haja fixà las reglas, adina persvas che quellas gidian l'organisaziun. Ussa na dastgia el gnanc pli metter pe en il bajetg. Tenor Kohli na giajan las ideas da la figura dominanta al WEF Klaus Schwab betg pli a prà cun las ideas da l'entir cussegl da fundaziun che consistia ussa da persunalitads manantas dad economia e politica. «Pauc emporta, tge fin ch'il cumbat per pussanza prenda, il donn è fatg. Betg exnum per il WEF, mabain per l'um che è per decennis stà collià cun il WEF», di Kohli.
L'avegnir dal WEF: En il cussegl da fundaziun èn persunalitads da renum sco l'anteriur vicepresident dals Stadis Unids Al Gore, ubain era la scheffa da la Banca centrala europeica (EZB) Christine Lagarde. Il fatg ch'il cussegl da fundaziun instradeschi ina inquisiziun externa independenta demussia che la situaziun saja seriusa, valitescha il redactur d'economia dad SRF Sven Zaugg. Il forum sez vegnia era a cuntinuar senza Schwab. Lez saja bain anc stà president dal cussegl da fundaziun, però dapi in onn senza funcziuns u incumbensas executivas. Il WEF saja gia dapi onns en ina fasa da restructuraziuns e refurmas.