Al principi, cura che l’uniun era gist furmada na devi anc betg tantas purschidas per giuvenils, ha Wiebke Schwing ditg envers il schurnal regiunal dad SRF. Ella s’engascha dapi il principi en l'uniun e maina il post central ch'era vegnì creà da lezzas uras.
Igl deva in entusiassem per s'engaschar per la chaussa.
Durant quests 20 onns ha l’uniun pudì engrondir la purschida en Grischun e realisar differents projects sco «Voila Graubünden» u er «Offene Turnhalle für Jugendliche». Era quest onn vegnan els a realisar in project en collavuraziun cun l’Uffizi da sanadad dal Grischun. I sa tracta d’in project cun num «Bisch OK» nua che la finamira è da chattar vischnancas che vulan tematisar la sanadad psichica da giuvenils per alura discutar pussibilitads per meglierar la situaziun.
Cun in sguard en il futur datti ina u l’autra sfida per l’uniun, manegia Caroline Morand, la presidenta da la suprastanza envers il schurnal regiunal dad SRF. Per l'ina è la digitalisaziun e cunquai era la finamira da porscher a giuvenils sustegn digital ina sfida. Ils pensums da las collavuraturas e dals collavuraturs na sajan betg uschè auts e fan entras quai grev da crear novas purschidas.
A nus è conscient ch'uffants e giuvenils duessan vegnir accumpagnads er en il mund digital.
In auter punct che saja adina in zic difficil saja da chattar la glieud che s’engascha en la suprastanza e per l’uniun. Era da finanziar projects na saja betg adina simpel, quai causa ch'els èn dependents da sustegn dad autras uniuns, uffizis u fundaziuns.
Ma els vulan vinavant porscher a giuvenils ed uffants sustegn e pussaivladads per sa sviluppar.