La scol'auta da Berna ha publitgà in studi che mussa, ch'il persunal da tgira da la Svizra è stà cleramain pli stressà durant l'emprima unda da corona che usitadamain: 38% da las 4'100 persunas dumandadas annunzian che la chargia da lavur saja s'augmentada, cunzunt tar persunas sin las staziuns intensivas. La consequenza da quai è che 9,4% da las persunas inditgeschan er, ch'ellas sajan pli malcuntentas cun lur lavur.
En il Grischun «anc mender»
En il rom da l'inscunter mensil da la regenza Grischuna cun las medias avain nus dumandà il minister da sanadad Peter Peyer tge ch'el crai, co ch'i va cun il persunal da tgira en il Grischun. El schazegia, che la situaziun saja qua anc mendra: «Durant la segunda unda avain nus numnadamain gì bler dapli cas. Ed er durant la stad ch'è normalmain plitost ruassaivla per ospitals è il persunal betg vegnì da ruassar cunquai che nus avain gì blers turists en il Grischun.»
Schebain er persunas dal Grischun tutgan tar las persunas dumandadas na saveva il minister da sanadad dentant betg dir. Er betg, sche ospitals en il Grischun han renconuschì sin ina moda u l'autra la lavur da lur persunal. Quai hajan numnadamain tenor studi 38% dals ospitals fatg. U ch'els han dà dapli paja, bons ubain in regal a lur persunal. Quai ha gì in effect positiv sin la cuntentientscha da lavur: 8% da las persunas che han survegnì renconuschientscha èn stadas pli cuntentas che las persunas senza renconuschientscha.
Las organisaziuns dal persunal da tgira pretendan numnadamain adina puspè indemnisaziuns concretas, saja cun protests sin via ubain cun acziuns singulas .
Duvrà damain daners per ospitals
Er davart il budget ha Peter Peyer infurmà: Avant in onn aveva la regenza concedì in sustegn da 59 milliuns francs per ospitals . Per l'ina 5 milliuns per prestaziuns generalas e material e per l'autra 54 milliuns per cuvrir ils custs che ospitals han gì perquai ch'els n'han betg pudì operar tant. Avant in onn aveva il minister da sanadad tema ch'ils custs planisads na tanschan betg, uss è dentant sa mussa, che «nus n'avain betg duvrà tant».
