La Causa Quadroni scriva in ulteriur chapitel. La dretgira chantunala ha approvà il recurs dal whistleblower en connex cun l’ingiant da ses possess. Quai rapporta la «Südostschweiz». L’Uffizi da concurs Engiadina Bassa / Val Müstair aveva annunzià il zercladur l’ingiant dal possess dad Adam Quadroni per mez avust.
L’advocat da Quadroni aveva crititgà questa decisiun en plirs puncts: tranter auter il termin d’ingiant a curta vista, sco er indicaziuns manglusas da l’uffizi. Uschia sa basia la stimaziun dal pretsch da las immobiglias sin l’onn 2017. La dretgira ha lura revocà l'ingiant.
La Dretgira chantunala approva uss l'argumentaziun da Quadroni – cun excepziun ch'il termin na saja betg stà memia a curta vista. La stimaziun dal pretsch da las immobiglias na saja en vista al svilup dal pretsch d’immobiglias betg valabla. Era na sajan midadas da zona ed in donn dad aua vi da la chamona da chatscha betg resguardads. I dovria ina nova stimaziun dad ina persuna dal fatg che fetschia in dossier «che infurmescha interessents potenzials avunda detaglià», citescha la «Südostschweiz» la dretgira.
