En in'emna fiss stà il termin per l'ingiant dal possess d'Adam Quadroni. Ina chasa ed ina chamona da chatscha fissan vegnidas ingiantadas da l'uffizi correspundent en l'Engiadina. Quadroni ha dentant fatg recurs tras ses advocat cunter quella decisiun, perquai che las cundiziuns per l'ingiant sajan stadas dischavantagiusas.
En il fegl uffizial dal chantun d'ier è stà inditgà ch'il ingiant è revocà. L'advocat da Quadroni ha ditg envers la «Südostschweiz» ch'il recurs sa refereschia per l'ina sin il termin fixà a curta vista, e per l'autra sin indicaziuns manglusas da l'uffizi. Uschia sa basia la stimaziun dal pretsch da las immobiglias, che tutga tar in l'ingiant, sin l'onn 2017. Ulteriuras infurmaziuns manchian u sajan sbagliadas.
Avant tschintg onns ha Quadroni fatg enconuschent cunvegnas sistematicas davart ils pretschs en l’industria da construcziun grischuna. Oz ha Quadroni naginas entradas pli ed è indebità, perquai vegn ses possess ingiantà, tranter auter sia chasa a Ramosch.
