Avant tschintg onns ha Adam Quadroni fatg enconuschent cunvegnas davart ils pretschs sistematicas en l’industria da construcziun grischuna. En las qualas è el sez stà involvì fin ch’el na vuleva betg pli sa participar ed è ì a la publicitad. Adam Quadroni n’ha oz naginas entradas pli ed è indebità. Sia interpresa da construcziun ha el pers.
Avant duas emnas ha il Fegl uffizial svizzer da commerzi publitgà che las immobiglias da Quadroni duaian vegnir ingiantadas tras l’uffizi da concurs. La chasa a Ramosch en Engiadina Bassa cun garascha ed annexa vegn stimà a radund 1,7 milliuns francs. Dasper differents terrens duai er sia tegia da chatscha cun conturn vegnir ingiantada. La valita stimada da l’uffizi da concurs: 110’000 francs. El saja ruinà, di Quadroni a «Schweiz Aktuell»: «Igl è insupportabel. Mia chasa è l’ultim che m’ha anc dà tegn.»
Igl è insupportabel. Mia chasa è l’ultim che m’ha anc dà tegn.
Il temp da la publicaziun da l’ingiant è contestà
Ses advocat Matthias Brunner disturba il mument da la publicaziun da l’ingiant. Quel saja fitg a curta vista – ed er anc avant las vacanzas da stad, quai possia sminuir la qualitad da las offertas: «Uschia n’ha signur Quadroni nagina schanza da chattar sez ina schliaziun – per exempel cun la regenza. I va simplamain per quai che cumpraders potenzials, ch’investissan summas remartgablas, n’han nagin temp d’examinar offertas seriusas. Il ristg exista che la chasa possia vegnir vendida per in pretsch da schnepli, sin cust da signur Quadroni.»
L’uffizi da scussiun e concurs da l’Engiadina Bassa renviescha las reproschas. Sin dumonda da SRF menziunescha l’uffizi ch’il proceder saja usus: «Ils dus mais èn en il rom usità, uschia avain nus era liquidà auters ingiants.»
Engraziament uffizial, ma nagina indemnisaziun
La cumissiun parlamentara d’inquisiziun (PUK) dal Cussegl grond dal Grischun ch’ha examinà il cas dal cartel da construcziun ha terminà il rapport avant dus onns. Silsuenter ha la regenza formulà «respect, engraziament ed appreziaziun» a Quadroni. Discurs davart ina indemnisaziun finanziala per Quadroni èn dentant bloccads dapi l’emprim inscunter: «Igl ha dà avant in onn e mez ina survista da la situaziun cun ina delegaziun da la regenza. Suenter avain nus dentant be survegnì il messadi che la regenza veglia sco emprim spetgar ils ulteriurs process», di l’advocat da Quadroni. Tenor Matthias Brunner giaja er per ina indemnisaziun per quai ch’il whistleblower haja prestà per il chantun: «Igl è incontestà ch’il chantun ha profità dal curaschi civil da signur Quadroni. Igl è probabel vegnì spargnà fitg blers daners. Entant èsi segir milliuns ch’én idas al chantun pervi da l’activitad da Quadroni.»
Igl è incontestà ch’il chantun ha profità dal curaschi civil da signur Quadroni.
La regenza grischuna n’è betg s’exprimida concret areguard in’indemnisaziun fin oz. Quai è pia anc avert. Che l’ingiant da sia chasa è vegnì publitgà gist uss considerescha Quadroni sco disfavuraivel: «Jau sper per mai ina buna, faira ed acceptabla schliaziun – per ils giaschoms sco era per mai persunal.»
Il rapport dad SRF:
