- *1967, creschì si a Cuira
- maridà, dus uffants
- fiduziari, econom
- dapi il 2024 president da la citad da Cuira
- 2011 – 2023 parlament da Cuira
- 2014-2019 president da la fracziun da la PLD
Tenor resultat final ha Hans Martin Meuli survegnì 4'326 vuschs e Patrik Degiacomi 4'310 vuschs.
Jau hai grond plaschair da quest resultat e ma legrel da dastgar surpigliar quest uffizi a partir dal schaner 2025.
In punct impurtant per sia legislatura saja da lavurar bain ensemen cun il nov team. Gist l'ultim temp hai dà bleras discussiuns ed ina atmosfera nauscha en il cussegl da la citad. Quai veglia el surmuntar. Plinavant vul el pigliar en mira la situaziun da drogas enturn il Stadtpark, realisar la stanza da consum ed augmentar la segirezza. In auter punct sajan abitaziuns: Il cussegl da citad stoppia prender mesiras per pussibilitar dapli abitaziuns pajablas.
«Fidaivel, segir da sasez e modest»
Uschia descrivessan tenor Meuli ses collegas ad el. Plinavant saja ses lieu preferì a Cuira è il Fürstenwald. E Cuira descrivess el sco evla, in utschè che sgola aut en l'aria e «vesa da là or er il futur». Dapli dumondas pli persunalas ha el respundì en l'intervista cun RTR.
Resultat definitiv suenter segunda dumbraziuns
Gia la dumengia ha la citad annunzià Hans Martin Meuli sco nov president – dentant cun l'avis ch'ins stoppia dumbrar anc ina giada. Pervia da la differenza fitg pitschna, ch'era la dumengia 18 vuschs, ha la citad da Cuira tenor sia lescha anc ina giada stuì dumbrar las vuschs.
Hans Martin Meuli è gia sa legrà la dumengia fitg dal resultat, ha el ditg envers Radio RTR.
Jau hai quintà cun bunas schanzas cun quai che l'allianza burgaisa ha giugà cun.
Fertant che Meuli è sa legrà, aveva ses concurrent direct, Patrik Degiacomi (PS) gia acceptà sia sconfitta. El ha la dumengia gratulà a Hans Martin Meuli per sia elecziun. Cun in resultat cnap haja el quintà, di el en l'intervista cun Radio RTR. In motiv ch'igl n'ha per el betg bastà vesa el en connex cun ils resultats da l'emprim scrutini. Cun quai ch'el aveva in grond avantatg, pudessi esser ch'ins n'ha betg mobilisà avunda. Ils burgais hajan forsa fatg quai pli bain.
Scumpartiziun da departaments
La cumposiziun dal cussegl da citad è gia vegnì decis avant trais emnas: Patrik Degiacomi (PS), Hans Martin Meuli (PLD) e Simon Gredig (Verda) furman a partir dal 2025 la regenza da Cuira. I mancava be la decisiun davart il presidi. Ils trais departaments han ils trais cussegliers da la citad scumpartì avant intgins dis.
- Patrik Degiacomi tegna vinavant il departament per furmaziun, societad e cultura.
- Simon Gredig surpiglia il departament da construcziun, planisaziun ed ambient. El succeda a Sandra Maissen che n'è betg vegnida reelegida.
- Hans Martin Meuli vegn a manar il departament da finanzas, economia e segirezza. El succeda cun quai a ses collega da partida e president da citad partent Urs Marti.
Nov'entschatta suenter temp da crisa?
A partir dal schaner 2025 èn ils novs cussegliers ed il president en uffizi. Las elecziuns d'avant trais emnas avevan procurà per grondas discussiun. La cussegliera da citad Sandra Maissen (AdC) n'è betg vegnida reelegida. Quai era ina surpraisa, tant per ella sco er per ils novs suprastants da Cuira.
Fatg star attent ha en quel connex era in rapport che la cumissiun da gestiun da la citad da Cuira ha publitgà curt avant las elecziuns. La cumissiun vegn a la conclusiun che la collavuraziun aifer la suprastanza saja disturbada. Quai s'ha er confermà en la sesida dal parlament pauc suenter las elecziuns. Il president da la citad actual, Urs Marti (PLD), è schizunt sa perstgisà e ditg che la suprastanza fetschia actualmain lavur nauscha.
