En ses rapport vegn la cumissiun da gestiun a la conclusiun che las proceduras tar duas fatschentas en il departament da la cussegliera da la citad Sandra Maissen na sajan betg idas tenor las prescripziuns. Il segund punct dal rapport pertutga la schletta relaziun e la disfidanza en la suprastanza da Cuira. Il parlament ha discutà il rapport ed incumbensà la suprastanza da la citad d’instradar ina retschertga da persunal tar il cader superiur da la citad.
Urs Marti sa perstgisa
En la debatta ha il president da la citad, Urs Marti, confermà la schletta atmosfera ed il clima da disfidanza che regia. El deploreschia fitg ch’i na saja betg gartegià al gremi da chattar ina soluziun. La lavur da la suprastanza saja schletta e perquai è Marti sa perstgisà envers il parlament. El sa turpegia per questa situaziun. I na regia nagina transparenza, la communicaziun saja nauscha, decisiuns vegnian ignoradas e questas differenzas aifer il gremi sajan era arrivadas en ils singuls departaments ed uschia chaschunà malsegirtads e frusts tar collavuraturas e collavuraturs.
La cussegliera Sandra Maissen ch'è stada en il focus da la critica, ha er confermà la schletta atmosfera ed il clima da disfidanza en la suprastanza da la citad. Ella ha explitgà pertge che las proceduras tar duas fatschentas en ses departament na sajan betg idas tenor prescripziuns e pertge ch’ella saja sa decidida per soluziuns pragmaticas. Per la nausch'atmosfera entaifer il gremi executiv da Cuira saja dentant l’entira suprastanza responsabla e betg ella suletta.
Cumissiun da gestiun è trumpada
Malgrà la schletta atmosfera ed il clima da disfidanza resta la suprastanza actuala en uffizi enfin la fin dal 2024. A las ultimas sesidas da la suprastanza èn mintgamai duas persunas da la cumissiun da gestiun da Cuira sa participadas cun la finamira d’intermediar tranter ils trais commembers da la suprastanza. Sco ch'il president da la GPK, Jürg Kappeler, ha ditg en la debatta, na saja quai dentant betg reussì d’intermediar, uschia che la preschientscha da la cumissiun na fetschia betg pli senn.
Anc enfin dal onn
Enfin la fin da quest onn resta la suprastanza actuala en uffizi. Sandra Maissen vegn a terminar ses engaschi politic en l’executiva da Cuira la fin dal 2024 cunquai cunquai ch’ella n’è betg vegnida reelegida. Urs Marti sto chalar pervia da la limitaziun dal temp d’uffizi. A partir dal 2025 furman Patrick Degiacomi (enfin uss), Simon Gredig e Hans Martin Meuli la nova suprastanza da Cuira.
