Mustér
Mustér ha refusà cun 56% da construir la gronda ovra solara sin l'Alp Run. L'ovra Magriel, ch'è be radund in terz uschè gronda sco quella da l'Alp Run, ha il suveran dentant approvà. 66% han ditg Gea als plans per quella. La participaziun a l’urna è stada tar radund 62%.
Bever
En il segund scrutini hai tanschì. Il suveran da Bever ha elegì Selina Nicolay cun 166 vuschs sco presidenta communala. Roland Margadant, ch'ha era candidà per il presidi, ha survegnì 125 vuschs. La participaziun è stada tar bun 66%.
Claustra
Il suveran da Claustra ha ditg cun 58% Gea al project d'ina ovra solara e la participaziun finanziala a quella. Medemamain han ils da Claustra approvà cun clera maioritad da 1'344 vuschs il quint annual dal 2022.
Bravuogn Filisur
A Bravuogn Filisur è vegnì reelegì Luzi C. Schutz sco president communal. Schutz era vegnì elegì il 2017 sco emprim president da la vischnanca fusiunada.
Churwalden
A Churwalden è la revisiun parziala da la constituziun communala vegnida approvada. 457 han ditg Gea e 62 Na. I va per reglar las incumbensas da l'anteriura vischnanca burgaisa aifer l'administraziun communala. La vischnanca burgaisa da Churwalden ha fusiunà per il prim da schaner 2023 cun la vischnanca politica da Churwalden.
En pli ha il suveran elegì Svenja Hardegger-Caviezel e Thomas Schwendener en il cussegl da scola.
Glion
Sarina Casanova è elegida da nov en il parlament communal. Ella ha survegnì 558 vuschs, 157 dapli che Daniel Schneider Tata. Sarina Casanova abitescha a Glion ed è stada inizianta e presidenta da la cumissiun da giuventetgna da la vischnanca da Glion, scriva la FMR. Ella entra en uffizi il prim da november. 36,4% da las persunas cun dretg d'eleger èn sa participadas.
Lumnezia
Las Lumnezianas ed ils Lumnezians han approvà la lescha da persunal per la vischnanca Lumnezia. L'adattaziun da la lescha è vegnida proponida en connex cun midaments da la lescha da lavur chantunala. 559 persunas han votà Gea, 109 Na, cun ina participaziun totala da 42%. La radunanza communala ha recumandà unanimamain d'acceptar la lescha.
Puntraschigna
Il suveran ha elegì Roman Kling cun 455 vuschs en il cussegl turistic, cun in pli absolut da 230 vuschs.
Sumvitg
Votantas e votants da Sumvitg èn sa decidids cun 273 vuschs Gea e 219 vuschs Na per ina revisiun parziala da la constituziun communala. Da nov vegn la vischnanca manada d'in directori che sa cumpona dal president communal, il chanzlist ed il manader infrastructura (plazza creada nov). Cun questa midada po la suprastanza sa concentrar sin la lavur da manar la vischnanca strategicamain ed il directori s'occupa da dumondas operativas.
Sursaissa
475 persunas han elegì Ernst Sax sco president da la vischnanca. Per ulteriurs candidats hai dà 47 vuschs. Uschia è Sax reelegì. En la suprastanza èn Fabien Walder, Michael Cahenzli, Hansjörg Sax e Marco Casanova vegnids elegids. Chantal Bleiker, Silvan Janka e Beat Nay n'èn betg vegnids elegids.
Tavau
Walter von Ballmoos è nov commember da la suprastanza. El ha fatg 1'500 vuschs. Agnes Kessler, la cuntracandidata, ha fatg 1'264 vuschs. Von Ballmoos entra en uffizi ils 15 da november. El surpiglia il post vacant, suenter che Iris Hoffmann-Stiffler era sa retratga la fin da zercladur. 45,8% da la populaziun da Tavau èn sa participads a l'elecziun communala.