La gronda reorganisaziun ha cumenzà la fin dal tschientaner passà cun schliar il parlament communal. Uss, 20 onns suenter, hajan els reponderà las lavurs ed incumbensas, declera il president communal da Sumvitg Patrick Schaniel. Quella analisa haja mussà che las suprastantas ed ils suprastants hajan da s’occupar il mument cun bleras dumondas operativas ed il pensum principal, da manar strategicamain lur departament, vegnia a la curta. Cun l’introducziun d’in directori vegnian els pli effizients, surtut quai che pertutga projects, uschia Schaniel. La populaziun da Sumvitg ha da decider ils 22 d'october sur da la revisiun parziala da la constituziun communala ed uschia l'introducziun dal sistem da directori.
Plirs sistems pussaivels, directori il pli ideal
L’emprim saja stà da discutar co ins vegnia a meglierar l’effizienza. Il sistem da direcziun portia plirs avantatgs. Per exempel possian ils projects gronds e pitschens uschia vegnir promovids a moda ideala perquai che las persunas dal fatg possian s’occupar da quels, di Patrick Schaniel. La direcziun futura duai sa cumponer dal president communal, dal chanzlist communal e dal manader infrastructura. Ina nova plazza che vegn creada aposta.
Manader infrastructura dovri uschè u uschia
La plazza dal manader infrastructura è gia publitgada dapi in temp. Els hajan era gia survegnì annunzias. Il mument vegnian quellas evaluadas, di il president communal. La plazza dal manader infrastructura dovrian els uschè u uschia, i n’emportia betg sche la populaziun vul il sistem da direcziun u betg. Questa persuna vegn en avegnir ad esser responsabla per tut las participaziuns tecnicas en vischnanca, dal guaud fin las vias ed il provediment d’aua. Questa persuna dovria per vegnir pli effizient. Per la populaziun muntia quai che la vischnanca vegn d’ademplir meglier las incumbensas e perquai giaja la finala, di Patrick Schaniel.