En il segund scrutini hai tanschì. Il suveran da Bever ha elegì Selina Nicolay cun 166 vuschs. Roland Margadant, ch'ha er candidà per il presidi, ha survegnì 125 vuschs. La participaziun è stada tar bun 66%.
Nicolay è lavurera sociala ed è stada guardiachamona. Ella vegn a pudair surpigliar l'uffizi il prim da schaner 2024. Selina Nicolay è er en il Cussegl grond e commembra da la Partida socialdemocratica.
Manchentà la maioritad en emprim scrutini
Cunquai che l'anteriur president communal Fadri Guidon è sa retratg or da motivs professiunals è la vischnanca da Bever stada en tschertga d'ina nova presidenta u in nov president. A las elecziuns dals 17 da settember n'ha nagin cuntanschì la maioritad absoluta. Nicolay ha manchentà la maioritad absoluta per duas vuschs. Margadant ha fatg 68 vuschs e Victorina Vital 64 vuschs. Da 468 persunas cun dretg da votar avevan 269 sa participadas.
