Sin l’entir territori da la vischnanca da Surses è per il mument en vigur ina zona da planisaziun – quai pervia da la revisiun totala decretada il favrer 2019. La suprastanza ha decis da prolungar questa zona da planisaziun. Igl è la terza giada che la zona da planisaziun vegn prolungada.
Extraordinari na saja quai dentant betg, di il president communal Daniel Wasescha. La raschun: la revisiun totala na saja anc betg pronta per suttametter ella al pievel. I dovria differents plans, decisiuns e documents dad uffizis – ina cumissiun saja actualmain vi d’elavurar tut quai. I dovria anc ina u l'autra decisiun, uschia che Daniel Wasescha na possia betg numnar in termin cura che la revisiun totala possia vegnir publitgada. Midadas vegnia a dar en tuttas fracziuns da la vischnanca. Il chantun ha dà glisch verda per prolungar la zona da planisaziun en vischnanca da Surses fin la fin da favrer 2026. Ils da Surses han ussa 30 dis temp da far recurs tar la regenza.
