Avant l'avertura da la stagiun datti da far inquala lavur en la Viamala. L'aua vegn puspè laschada cular, ils indrizs sanitars vegnan prendids en funcziun, la rauba per la pitschna stizun en il center da visitaders sto vegnir empustada ch'ils regals possian vegnir emplenids ed i dat diversas lavurs da schubregiar. Durant quest enviern n'haja dà nagins donns pli gronds, di il nov manader Lars Dünner. Pia nagins tschabargals u indrizs d'illuminaziun da remplazzar.
L'emprim che nus avain fatg durant las preparativas per la stagiun era da puspè tschentar en la maschina da café.
Urs Attenhofer ch'era prest trais decennis manader da fatschenta na sa regorda betg ch'igl haja en quels onns ina giada dà propi gronds donns durant l'enviern. El sustegna questa primavaira anc ses successur durant las preparativas per la stagiun. Sch'i dettia donns lura plitost durant la stagiun – quai pervia dad auas grondas, di Urs Attenhofer. Là saja la laina ch'il Rain Posteriur portia in problem. Curt avant l'avertura è quasi tut pront per ils visitaders e las visitadras – la maschina da café è en funcziun e las stgalas schubregiadas. Sulettamain las crunas da la stizun vegnan uss anc emplenidas.
-
Bild 1 von 6. Urs Attenhofer cun «sia» tschigulatta. Bildquelle: RTR.
-
Bild 2 von 6. Il center da visitaders da la chavorgia Viamala è vegnì creà dals architects Stefan Kurath ed Ivano Iseppi. Bildquelle: RTR.
-
Bild 3 von 6. Urs Attenhofer (san.) surdat la gestiun a Lars Dünner. Bildquelle: RTR.
-
Bild 4 von 6. Dapli che 300 stgalims van giu fin al Rain Posteriur. Bildquelle: RTR.
-
Bild 5 von 6. Il center da visitaders nov è vegnì inaugurà l'onn 2014. Bildquelle: RTR.
-
Bild 6 von 6. Quest onn è la chavorgia averta a partir dals 29 da mars fin ils 2 da november. Bildquelle: RTR.
Midada al timun
En la direcziun da la chavorgia da Viamala datti ina midada: Suenter 28 onns sco manader da fatschenta banduna Urs Attenhofer sia funcziun e va en pensiun. Lars Dünner surpiglia da nov quest’incumbensa. Dünner era avant manader da marketing tar Viamala Turissem ed enconuscha fitg bain la regiun. Il nov manader da fatschenta, Lars Dünner, ha ditg envers RTR ch'el haja gia ideas, co sviluppar la chavorgia. Uschia vul el per exempel modernisar la caverna d'infurmaziun e far quella pli multimediala. Per avair dapli visitaders en l'avegnir pensa el ch'ins pudess forsa schizunt far curs cun bus supplementars da Tusaun u da Ziràn.