La surpraisa è gronda. Claudia Husmann ha enseman cun il cussegl d'administraziun dal center da Sanadad Savognin decidì da bandunar l'avust il center. Communablamain hajan ins sa cunvegnì. Quai ha Daniel Wasescha, il president communal da Surses e commember dal cussegl administrativ ditg envers RTR. Husmann vegn a lavurar enfin là per il center. La vicedirectura d'enfin ussa, Sandra Luzio, surpiglia ad interim il post da directura.
Igl è stada ina decisiun communabla ch'è creschida las davosas emnas.
La decisiun da Husmann da bandunar il Center da Sanadad Savognin vegn surprendentamain, cun quai ch'il center è il mument en ina fasa d'elavurar in plan concret per evitar deficits structurals. Ina da las dumondas centralas è tge servetsch che l'ospital duai anc porscher en l'avegnir e tge betg. Per il mument manca al center la liquiditad. Davart da la direcziun dal Center da Sanadad Savognin n'è nagin stà a disposiziun per in discurs. Ins ha renvià al cussegl d'administraziun.
Deficit dal spital raschun per deficit communal
Las cifras cotschnas dal Center da Sanadad Savognin èn il motiv per il deficit da radund dus milliuns francs. Quella summa ha la vischnanca Surses surpiglià, quai resulta or da la radunanza communala dal december passà. Uss èsi da sperar che quest import dal maun public saja stà in import propi unic e ch'ins possia la primavaira preschentar schliaziuns e propostas.