L'interpresa d'energia Alpiq planisescha in implant solar sur Sufers che duai cumpigliar circa 21'800 moduls solars sin ina surfatscha da 10 hectaras. Cun ina investiziun da 40 milliuns francs duai l'implant furnir forza electrica per circa 3'500 chasadas. Ad onn duessan vegnir producids 16GWh/a. La prestaziun munta a 9,5 MWp. La vischnanca da Sufers ha approvà il project la stad 2024. La dumonda da construcziun duai vegnir inoltrada la primavaira 2025.
Custs pli auts che previs
Pierre-Alain Herren, expert per energias regenerablas tar Alpiq, di ch’ins lavuria anc vi da las dumondas per ina lubientscha da bajegiar definitivas. Sfidas finanzialas pudessian però periclitar il project: ils custs da realisaziun èn pli auts che previs, ed ils pretschs d’electricitad actualmain bass mettan en dumonda la rentabilitad. Alpiq tschertga actualmain cumpraders e cumpradras a lunga vista per l'electricitad producida.
Organisaziun d'ambient sa anc memia pauc
Era dumondas ecologicas chaschunan malsegirtads. La Pro Natura Grischun haja exprimì dubis e veglia spetgar il rapport ecologic avant ch'i dettia in'opiniun definitiva. Sche l'ovra solara vegn propi realisada dependa sch'ins dumogna las sfidas finanzialas ed ecologicas.
