Quasi en l'ultim mument vul uss la vischnanca da Sufers anc siglir sin il Solarexpress. Igl n'è dentant betg uschia che Sufers ha pir uss cumenzà da studegiar vi d'ina ovra solara. Gia fitg baud hajan els fatg il pass envers il chantun, di Christoph Zeitz, il president communal. L'emprima proposta per il lieu da l'implant saja dentant vegnì refusà. Ussa hajan els chattà in nov lieu adattà.
Nagina zona da protecziun
Ils 20'000 moduls solars duessan vegnir installads sin stgars 2'000 meters sur mar sur la vischnanca da Sufers, sin ina spunda da pastgira sin ina surfatscha da 10 hectaras – quai cun in sistem innovativ da sujas. Quest sistem reduceschia massivamain il dumber da fundaments en il terren, uschia che quel vegnia schanegià uschè bain sco pussaivel.
Era possian las nursas vinavant vegnir pavladas sin la pastgira. Gist sur il territori planisà per l'implant è in prà setg da muntada naziunala. Christoph Zeitz accentuescha che quel na vegnia en nagin cas tangà da l'installaziun. Plinavant sa chattian passa 100 hectaras da ulteriurs prads setgs cun muntada naziunala sin il territori sur la vischnanca, che na vegnian segir betg ad esser pertutgads dal project.
Conscientamain spargnus cun infurmaziuns
Avant duas emnas hai dà ina saira d'infurmaziun per la populaziun da Sufers. Envidà a quella hajan ins conscientamain cun flyers – e betg per exempel cun ina publicaziun en il figl uffizial.
Nus essan conscientamain stads spargnus cun infurmaziuns vers anora. Nus vulain sco pli emprim che la populaziun è infurmada, e che mintgin e mintgina po far sia opiniun independentamain.
Oravant ha la vischnanca laschà far in studi da realisabladad. Sufers pudess profitar finanzialmain da l'implant solar. Quai na saja dentant betg l'intenziun principala, accentuescha Christoph Zeitz. «SufersSolar» pudess esser ina contribuziun per schliar il problem da l'acquisiziun d'energia regenerabla, e la vischnanca da Sufers pudess esser in bun exempel. Sco partenari da project è la fatschenta Alpiq en acziun, ed ins saja sin la tschertga d'ulteriurs partenaris. Sche e co che la vischnanca sa participeschia al project, na saja anc betg cler. Quai è tema en in proxim pass.
Il plan da temp saja fitg sportiv, di Christoph Zeitz. Dentant cun il consentiment da la populaziun da Sufers speria el che la decisiun vegnia purtada da las e dals da Sufers e ch'i na dettia betg varsaquantas protestas, uschia ch'in possia lavurar vinavant. Lura saja realistic da pudair ir vi da la rait cun quels 10% ch'il «Solarexpress» pretendia fin la fin dal 2025. Plinavant pensa Christoph Zeitz ch'i vegnia uschia ni uschia a stuair dar ina schliaziun da successiun davart da la Confederaziun, perquai ch'i vegnia probabel er anc a dar auters projects che pudessan avair retard.
Noss plan è fitg sportiv. Jau sun dentant optimistic, e vom da quai anora ch'i vegn a duvrar ina schliaziun da successiun per il «Solarexpress».
Pro Natura sceptica
Armando Lenz da la Pro Natura Grischun è pir avant in pèr dis vegnì a savair dal project, quai da persunas privatas che fetschian quitads per la natira. Els sajan da princip sceptics envers projects solars en il territori alpin. Per valitar pli exact il project da Sufers haja el dentant memia paucas infurmaziuns. I na saja betg ses pensum da valitar l'agir da la vischnanca.
Per mai persunal dat quest agir in zic il sentiment ch'ins vuless zuppar insatge.