La bilantscha da l'emprim semester da l'onn da scola 2024/2025 è positiva – tant tar Yvonne Scherz sco era tar Simona Beeli.
Nova sfida suenter passa 30 onns scolina
Yvonne Scherz, oriunda da Farden, ha passa 30 onns lavurà sco mussadra da scolina. L'atun passà ha ella sa laschà en sin ina nova aventura professiunala sco scolasta da l'emprima e segunda classa a Donat. In mund dal tuttafatg nov per la dunna da 56 onns. Avant l'entschatta da l'onn da scola haja ina u l’autra chaussa bain dà da ponderar e fatg in zic mal il venter. Per exempel il dumber da 13 scolars – ils ultims 20 onns haja ella adina gì ina gruppa da nov fin 10 uffants. En scolina sajan ins fitg liber. En scola haja ella tuttenina bleras chaussas che sajan dadas avant, ina massa roms e cudeschs per lavurar tras e finamiras ch'i vala da cuntanscher.
Cura che jau hai vis tut quai ch'ils scolars e las scolaras ston savair la fin da l'onn da scola hai jau bain stuì tragutter ina duas giadas.
Ma ella saja sa vivida en bain en la materia e lavuria gugent cun ils meds d'instrucziun. I dettia simplamain ina massa da preparar. Gist cun preparar stoppia ella magari anc sa disar al livel dals uffants da scola. Pannas pli grondas n'haja anc dà naginas. Fin ussa saja gartegià fitg bain. Ella haja grond plaschair e vesia ch'ils uffants hajan era plaschair, uschia ch'els motiveschian in l'auter.
Sch'ils uffants vegnan dad isch en cun egls traglischants è quai mintga di in fitg bel mument.
Finalmain star davant l'atgna classa
La stad passada ha Simona Beeli, oriunda da Lon, survegnì ses diplom da scolasta a la scola auta da pedagogia a Cuira. Ils 12 d'avust èsi alura vegnì propi serius, a Donat ha la dunna da 22 onns cumenzà ses emprim onn sco scolasta cun la terza e quarta classa.
Jau ma sun legrada fitg da finalmain pudair star davant mia atgna classa.
Cun quai ch'i saja ses emprim onn sco scolasta haja ella empruvà or ina massa ed era fatg in u tschel experiment. Ella haja ina massa ideas e grond plaschair da ses mastergn. Pannas pli grondas n'haja fin uss dà naginas. Anzi, mintga di en scola dettia bels muments. I saja fitg bel d'emprender d'enconuscher meglier ils uffants che vegnian mintga di tar ella en scola. La lavur sco scolasta cun l'atgna classa saja l'entschatta bain stà insatge nov ed ella haja l'emprim stuì sa viver en. Da la scolaziun haja ella survegnì la basa ed haja circa savì sin tge ch'ella sa laschia en. I saja dentant bain era stà in zic in sigl en l'aua fraida – en il mintgadi da scola dettia simplamain chaussas ch'ins na possia betg emprender teoreticamain. Gist la lavur cun ils geniturs u la flexibladad e la spontanitad as emprendia simplamain mo cun far. La communicaziun cun tuts, saja quai il team, la manadra da scola u er ils geniturs saja fitg buna. Simona Beeli di ch'ella saja fitg cuntenta cun ses emprim semester sco scolasta.
Tut funcziuna fitg bain. Jau vom mintga saira a chasa cun in surrir.