Val Schons - Emprim di da scola suenter las vacanzas

Impressiuns da l'emprim di da scola

Andeer

Curt avant las 08:00 la bun'ura è la plazza da scola plaina ad Andeer cun blers uffants e geniturs. L'atmosfera è buna l'emprim di da scola:

Era per pedagogs e geniturs è l'emprim di da scola insatge spezial. Nus avain discurrì cun in bab da schumellinas ed ina pedagoga curativa co els resentan quest di:

Ziràn

Era en la scola superiura a Ziràn è l'atmosfera buna. Sin quest stgalim vali gia da studegiar tge far suenter la scola. Las scolastas e scolasts da Ziràn emprovan là da gidar ed er las scolaras e scolars sajan fitg motivads, ha ditg il scolasts Marc Decurtins da la scola superiura a Ziràn envers RTR.

Donat

Noss gieu «tge chaussas» dastgan quella giada giugar ils uffants da l'emprima classa a Donat. E ditg n'hai betg cuzzà fin che l'emprim uffant ha chattà la dretga soluziun:

En stanza da Simona Beeli a Donat pon ils uffants gidar da drizzar en la stanza, perquai che lezza n'è anc betg drizzada en a fin suenter la renovaziun.

«Fitg buna situaziun» quai che pertutga il dumber da scolastas e scolasts

Nus avain er visità il biro da la presidenta dal cussegl da scola Schons, Catrina Salis. Ella ha l'emprim di da scola visità mintga scola en la Val Schons ed haja entupà bleras fatschas rientas, era sche intgins dals uffants avessan anc gugent gudì las vacanzas in zic pli ditg. Sco Salis ha ditg, sajan ins il mument en ina buna situaziun quai che pertutga il dumber da scolastas e scolasts. Avant dus onns avevi numnadamain anc vesì ora auter, nua ch'ins haja gia stuì pensar vid in plan B. Dentant hajan ins uss chattà avunda persunal ch'i funcziuna er cun instruir en las linguas rumantsch e tudestg. Organisatoricamain cun avair scolas ed uffants che sa chattan en differents lieus, na saja quai dentant betg adina uschè simpel e dovria bler organisaziun da transport.

Ils trais lieus da scola en la Val Schons

Ils uffants da lingua tudestga da la val Schons van ad Andeer en la scola primara ed en scoletta. La scola superiura per tuts è a Ziràn. Là datti er ina scoletta rumantscha. La scola primara rumantscha è a Donat. Yvonne Scherz instruescha l’emprima e la segunda classa cun 13 scolaras e scolars; tar Simona Beeli da Lon che vegn a dar quest onn ses emprim onn da scola datti otg scolaras e scolars. La tschintg e sisavla classa vegn instruida da Bettina Nicca, ella ha 10 uffants en sia scola.

Or da l'archiv: