Diversas persunas èn s’inscuntradas gievgia saira, ils 24 d'october, per discutar l’avegnir dal Center da Sanadad Savognin. Quai suenter ch'il cussegl d’administraziun aveva avant tschintg emnas annunzià diversas mesiras pussaivlas per spargnar. Tranter auter era vegnì proponì da laschar avert l'ospital mo ils mais d’enviern.
Concretisar mesiras da salvament per l'ospital
Quellas ideas fruntan però sin resistenza. Perquai ha Luzi Thomann envidà ad ina saira da discussiun. Preschents sajan stads represchentants dal Center da sanadad, da la vischnanca da Surses, e petiziunaris che vulan salvar l'ospital, ha ditg Thomann. I sajan stadas discussiuns fritgaivlas, e gia l’entschatta da november veglia ins s’inscuntrar danovamain. Là vul'ins concretisar las ideas, co che l'ospital pudess exister vinavant en l’avegnir, ha ditg Thomann. Quellas ideas duessan vegnir preschentadas a la populaziun il december – anc avant la radunanza communala dals 9 da december, nua ch’il preventiv giaja en votaziun.
Grond sustegn per l’iniziativa
Sco la vischnanca da Surses ha communitgà ils 31 d'october, è l'iniziativa che pretenda da reorganisar il Center da sanadad a Savognin uss inoltrada. Passa 400 persunas cun il dretg da votar hajan suttascrit quella. Necessarias fissan stadas 100 suttascripziuns. Uss ha la vischnanca da Surses peda in onn per tractar l’iniziativa e laschar votar.
L’iniziativa pretenda ch’i vegnia elavurà ina lescha, ch’il Center da Sanadad Savognin garanteschia ils meds finanzials necessaris per il provediment da basa staziunar e medicinal. L'iniziant da questa acziun è Guido Luzio.
