L'ospital da Tusaun examinescha diversas variantas per l'avegnir. Ad ina radunanza da delegads extraordinaria da la fundaziun Gesundheit Mittelbünden han expertas ed experts preschentà plirs scenaris. Quels cuntegnan tranter auter er ina varianta cun in center ambulant da sanadad e cas d'urgenza.
La finamira è tenor ils responsabels in provediment da basa che saja da supportar finanzialmain, hai num en ina communicaziun. Las vischnancas purtadras vegnan a decider l’atun che vegn davart la via e la spierta futura da l’ospital. A la radunanza da delegads extraordinaria è suandada in’infurmaziun per il persunal da la fundaziun.
Ospital Tusaun va sur ils cudeschs
L'organisaziun Sanadad Grischun Central sto vegnir sanada. Uschia hai gì num la primavaira 2024. Suenter grondas sfidas ils ultims onns ch'èn resultads ina perdita dad 8,2 milliuns francs l'onn 2023 – prendan las organisaziuns involvidas a maun mesiras per stabilisar las finanzas e segirar la qualitad da la purschida da sanadad en la regiun.
A la conferenza da proprietaris è vegnì preschentà in nov preventiv per l'onn 2024 che quinta cun ina perdita da radund 5,2 milliuns francs. La gronda part dal minus è planisà tar l'ospital da Tusaun cun bun 4,9 milliuns francs. Er in deficit vegn la Spitex a far – bunamain 0,3 milliuns. Quai muntia ad ina meglieraziun da bun 3 milliuns en l'emprim onn da la sanaziun.
Taskforce Sanaziun
Per meglierar la situaziun finanziala è vegnida creada ina taskforce. Quella duai augmentar il retgav e sminuir l'impundiment. Per quai vegnian ils collavuraturs e las collavuraturas involvidas en il process e mussian grond engaschament. La Sanadad Grischun Central saja decis da surmuntar las sfidas e mantegnair ina purschida da sanadad correspundenta a las directivas chantunalas.
Spital sin staziun intensiva
Christian Rathgeb il president dal cussegl da fundaziun è optimistic ch'il spital da Tusaun vegn or da la situaziun actuala. I dovra dentant ina gronda restructuraziun – cun la nova direcziun ed il nov cussegl da fundaziun saja el da fitg buna speranza ch'il project da sanaziun vegn ad avair success.
